quinta-feira, 13 de maio de 2021

MAE Preparadu Realiza Eleisaun Prezidensial

DILI, STLNEWS.co - Ministru Administrasaun Estatal (MAE), Miguel Pereira de Carvalho hatete, maske ho situasaun surtu Covid-19 maibe sira preparadu realiza eleisaun Prezidensial iha tinan 2022.

Kestaun nee hatoo husi MAE, Miguel Pereira de Carvalho ba jornalista sira, hafoin remata enkontru ho Prezidente Republika, iha rezidensia Prezidente, Farol, Dili, Kuarta (12/05/2021).

“Ohin enkontru ho Prezidente Republika hau mai informa ba Prezidente konaba preparativu ba governu halo, no planea atu halo hodi prepara ba eleisaun Prezidensial ba tinan 2022 nia. Hanesan ita hotu hatene mandatu Prezidente Republika sei termina iha tinan oin. Orgaun neebe mak ezekuta aktu eleitoral husi Sekretariu Administrasaun Tekniko Eleitoral halao nia atividade sira preparadu para atu realiza eleisaun Prezidensial iha tinan 2022, mesmu iha situasaun Covid-19 ″ hatete Ministru nee.

Governante nee hatutan, Sekretariu Tekniku Administrasaun Eleitoral (STAE) ohin loron rejista ona ate 31 Marsu Tinan 2021, leitores hamutuk 839.430 leitores iha rai laran, nomos leitor sira iha rai liur 6.010 no STAE mos ha hushui loron oin halo resensiamentu eleitoral, halo aktualizasaun baze de dadus eleitoral, nunee tempu balun antes de eleisaun tenke publika em uma lista de eleitores sira iha Centru de Votasaun sira.

Nia dehan, assuntu hirak nee mak ohin nia informa ba iha Prezidente Republika, kona ba agora dadaun STAE iha faze pré-eleitoral halo atividade lubuk boot ida iha tempu ida liu ona no tempu sira tuir mai ate Janeiru tinan oin.

“Depois iha faze de periodu de eleitoral neebe mak sei halao ona Janeiru tinan oin também realizasaun eleisaun Prezidensial kazu ita hakat ba segundu de volta mais STAE preparadu atu eleisaun.” tenik nia.

Medidas sira neebe mak STAE halo ona, nomos sei halo hodi prepara ba eleitores sira hodi ba tuir votasaun nee mos iha hotu ona.

“Hau hakarak hatete katak governu liu husi Sekretariu Tekniku Administrasaun Eleitoral preparadu atu prepara eleisaun Prezidensial iha tinan oin.” Katak nia.

Nia hatutan nia mos la fo komentariu CNE nia deklarasaun tanba nee orgaun administrasaun eleisaun seluk, ida aktu eleitoral seluk.

STAE hanesan orgaun neebe mak ezekuta aktus eleitoral refendadu sira ke tutela ba governu no tutela ba Administrasaun estatal preparadu para atu realiza eleisaun.

Prezidente Republika Francisco Guterres Lú Olo mos kontente bainhira rona informasaun konaba preparativu husi governu nia hodi prepara ba eleisaun Prezidensial iha 2022.

Reportajen: Emerenciana Pinto | Editor: Ekipa STL

Imajen: Ministru Administrasaun Estatal (MAE), Miguel Pereira de Carvalho. (Foto: Media PR)

Sem comentários: