KAZU VICENTE, PN BUDU NOTIFIKASAUN TRIBUNAL

DILI – Tribunal Distrital Dili (TDD) haruka ona karta notifikasaun ba Parlamentu Nasional (PN) hodi hasai imu­nidade ba arguidu Vicente Gu­ter­res atual Prezidente Parlamentu Nasional, maibe too agora PN laiha resposta ba tribunal.

Tuir Administrador Tribunal Distrital Dili, Duarte Til­man, tribunal liu husi Juiza Zumiaty Maria Freitas haruka ona karta notifikasaun ho nu­meru autus 1160 ba Parla­mentu Nasional hodi diriji ba Pre­zidente PN, Vicente Guterres liu husi Sekertaria recebido PN nian iha loron 31 Janeiru 2015. Nunee iha loron 11 fulan Fevereiro 2015, PN responde ba tribunal liu husi Vise Prezidente PN Adriano do Nascimento katak nia laiha kompetensia.

“Karta notifikasaun nee tribunal haruka tiha ona ba Parlamentu Nasional iha fulan Janeiru nee, no Parla­mentu Nasional rasik responde mai tribunal liu husi Vise  Prezidente Parlamentu Nasional, Adriano do Nas­cimento katak, nia laiha kom­petensia atu halo imundade. Nebe karta nebe tribunal haruka ba laiha koiñesementu ba iha Vise Prezidente Parla­mentu Nasional. Needuni karta neebe tribunal haruka ba nee Par­lamentu Nasional mak budu hela iha gaveta hodi impede tiha prosesu nee, maibe so atu dehan deit tribunal halo tuir deit lei,” dehan nia ba STL iha TDD, Sesta (17/04/2015).

Nia haktuir, karta nee diriji ba Prezidente Parlamentu Nasional, Vicente Guterres, mais Vise PN mak resposta fali. Entaun Parlamentu Nasional mak hakarak budu kazu nee halo kleur.

Entretantu membru Parlamentu Nasional husi Komisaun A nebe trata asuntu konstitusionais, justisa, adminis­trasaun publika, poder lokal e anti korup­saun, ­Depu­tadu Paulo Moniz Maia hateten, tuir regras normal nee so notifikasaun mai iha Prezidente Parlamentu Nasio­nal, Vicente Guterres mak nia (Vicente, red) bele hatene tuir nia iha kazu i bazea ba notifikasaun nee Parla­mentu Nasional sei deskuti no halo plenaria ida para hasai ninia imunidade, maibe too agora mos notifikasaun seidauk mai iha Parlamentu Nasional.

“Sim kazu nebe kona ba iha Prezidente Parlamntu Nasional, Vicente Guterres nee mai ona iha Parlamentu Nasional, maibe tuir loloos regras normal nee so notifikasaun mai iha Prezidente Parlamentu Nasional mak nia bele hatene tuir nia iha kazu. Bazea ba notifikasaun nee Parlamentu Nasional sei deskuti no halo plenaria ida para hasai ninia imunidade, maibe too agora mos notifikasaun nee seidauk lei iha Parlamentu Nasional, nebe hau la hatene Pre­zidente Parlamentu Nasional, Vicente Guterres iha kazu ka laiha kazu,” nia hateten.

Tuir Paulo, se notifikasaun nee mai ona iha Parlamentu Nasional atraves husi meja liu husi Prezidente Parlamentu fo sai ona ba iha deputadu sira halo plenaria para hasai ninia imunidade nee depende meja.

“Hau hanesan deputadu ida hein notifikasaun nee mai ona iha Parlamentu, atu bele deskuti iha plenaria bele hasai ninia imunidade nee depende meja, liu-liu hanesan Prezidente no Vise Prezidente nain 2,” katak Paulo.

Nia afirma, bainhira Komi­saun A hetan despaisu ruma nee naunser ke notifikasaun kualker surat ida mai iha Parla­mentu Nasional atraves de meja, depois mak ba iha Komi­saun A, nunee komisaun bele deskuti. Agora meja PN seidauk baixa ba iha Komisaun A, entaun Komisaun A seidauk hatene buat ida kona-ba asuntu ida nee. Domingas Gomes

Suara Timor Lorosae