GOVERNU-FONGTIL ASINA AKORDU BA PROJETU ESTADU

Governu ho FONGTIL, asina akordu memorandu intendimentuakordu atu loke odamatan ba sosiadade sivil atu partisipa ativu iha prosesu dezenvolvimentu rai ida ne’e nian, liu-liu tau matan hodi garante kualidade projetu Estadu hotu ne’ebé la’o iha Timor laran tomak.

Primeiru Ministru (PM), Rui Maria de Araújo hatete katak, akordu ne’ebé asina husi Gabinete Primeiru Ministru ho Sosiadade Sivil ne’e, atu hare kona-ba kualidade projetu.

Xefe Governu ne’e esplika, akordu ne’e atu sosiadade sivil sira mós bele partisipa ativu diak liu iha prosesu dezenvolvimentu rai ne’e nian, no atu kritika saida mak la’o lalos hodi bele hadia.

“Asina Memorandum de Intendementu ida entre Gabinete Primeiru Ministru ho FONGTIL, hodi nune’e ita bele dudu prosesu ne’e ba oin,”dehan Primeiru Ministru Rui Maria de Araújo iha Ministeriu Negosiu Estranjeiru i Koperasau, Segunda (25/5) antes atu asina MoU ne’e.

Xefe Governu ne’e dehan, sosiadade sivil sira sei halo monitorizasaun ba projetu Estadu hotu ne’ebé la’o iha Timor laran tomak, hodi garante kualidade projetu sira ne’e.

PM Rui Araújo dehan, planu ba buat hotu sei mai husi Governu, maibé ponta de entrada ba sosiadade sivil, sei liu husi gabinete Primeiru Ministru, mak foin buka mekanismu husi pontus fokais husi ministeriu relevantes, hodi nune’e Governu bele fó resposta ba input sira ne’ebé tama husi sosiadade sivil, iha kontestu auditoria sosial.

Alende ne’e, Diretur Ezekutivu FONGTIL, Arsenio Perreira mós hatete katak, memorandum intendementu ne’e, atu sosiadade sivil mellora diak liutan servisu Governu nian.

“Ita asina memorandu de intendementu ida entre sestu Governu konstitusional ho FONGTIL, nomós parte organizasaun sosial husi atu mellora diak liu, partisipasaun ativu ba dezenvolvimentu nian,”katak Arsenio.

Akordu ne’ebé FONGTIL ho Primeiru Ministru Rui Maria de Araújo asina tiha ona ne’e, atu sosiadade sivil sira monitoriza no kontrola lala’ok projetu sira iha Timor laran tomak.

Ho MoU ne’e, Arsenio lori sosiadade sivil hotu nia naran, hato’o agradesementu ba sestu Governu, tanba inisiativa ne’e atu fanun partisipasaun orgaun hot-hotu nian ba dezenvolvimentu nasional.tap

Jornal Nacional