SNI FRAKU DETEKTA MAUK MORUK

Ho operasaun fulan rua nia laran ne’ebe la konsege detekta no kaptura Mauk Moruk, hatudu momos katak, Servisu Nasional Intelizensia (SNI) fraku tebes no kbit intelizensia nian sei menus liu.

Tuir observasaun Fundasaun Mahein (FM) nian katak, durante ne’e SNI la iha informasaun naton hjodi transmite ba Komando Operasaun Konjunta (KOK) atu bele kaptura Mauk Moruk.

Direitur Ezekutivu FM, Nelson Belo, ba JNDiario iha nia servisu fatin, Segunda (25/05/2015), hateten katak, antes atu kualia kona-ba kualidade informasaun tenke haree didiak funsionamentu SNI durante ne’e.

“SNI nia ema sira nudar autor intelezente sira ne’e, sira nia serbisu ne’e iha kapasitadu diak ka lae,   sira hetan treinamentu ho material diak ka lae. Dala ruma ita bele dehan, intelezente la iha informasaun, intelezente la halao serbisu, maibe iha kapasidade naton ba sira atu halao sira nia serbisu ka lae, entaun antes ita fo serbisu ba instituisaun tenki halo kapasitasaun. Ne’e duni Governu tenki investe ,” tenik Nelson Belo.

Neslon Belo duvida ho kapasidade intelejensia durante ne’e iha operasaun atu detekta subar fatin Mauk Moruk.   Alende ne’e tenki iha apromiasaun komunitaria no meus barak maka tenki halo, tanba Mauk Moruk ho ninia grupu sira mos sidadaun nasional, bolu fo sira ninia oponiaun.   Asuntu kona-ba justisa nian bele kontinua submete no dialogu.

“Ita tenki uza ita nia meus kultural nahe biti bo’ot para resolve problema ho diak para bele miniza vitima, minima gastu, hau hnaoin bele diak tanba ita presiza povu bele asesu ba dezenvolvimentu ho livre povu bele asesu tos ho natar ho livre,” haklaken Nelson Belo.

Iha parte seluk Segundu Komandante   Geral Polisia Nasional Timor Leste (PNTL), Komsiario Faustinho da Costa hateten, nia parte la fo komentario ba asuntu operasaun KOK, tamba ne’e kompetensia Vice Xefi Estadu Maior F-FDTL Brigadeiro Filomono Paixão.

“Se ita bo’ot sira atu husu informasaun ruma ba operasaun HANITA nian, ita bo’ot sira husu Brigadeiro, nia maka hanesan Portavos ba iha operasaun Konjuntu ne’e,” hateten Komisario Faustinho da Costa. nax

Jornal Nacional