PROGRAMA POVU KUDA GOVERNU SOSA PARADU

Povu Munisípiu Bobonaro, preokupa programa Governu liu husi Ministério Comersio Industria e Ambiente (MCIA), ho naran ‘Povu Kuda Governu Sosa’ tanba to’o oras ne’e programa ne’e paradu tiha fali.

“Ami depende ba iha hare, maibe oras ne’e dadauk komunidade halerik hodi hein hela Governu atu mai sosa maibe iha realidade laiha Governu la tun sosa ami nia produtu lokal,” dehan Xefi Suku Raifu, Postu Administrativu Maliana Vila, Munisípiu Bobonaro, Alberto Fernandes ba jornalista sira, Tersa (19/05), bainhira akompaña Prezidente Repúblika (PR), Taur Matan Ruak, ho Ministru Estadu Kordenador Asuntu Ekonomia no Ministru Agrikultra, Estanislau da Silva, hodi halo koilheta ba hare iha natar refere.

Tuir Xefi Suku ne’e katak, rendimentu populasaun nian iha Suku Raifu mak Natar, Halo Tos kuda batar, aifarina no seluk tan.

Nia dehan, komunidade sira iha vontade servisu maka’as hodi hasa’e produsaun, maibe Governu la sosa. Tanba ne’e nia dehan, oras ne’e dadauk komunidade hahú muda fali sira nian moris ho modo tahan no seluk tan ba fan hodi hetan osan nune’e hatama oan ba eskola.

“Ami rekomenda ba Prezidente Repúblika hatutan ba Governu atu sosa produtu local,”hatete Alberto.

Hatan ba Prekupasaun ne’e, Ministru Estadu Kordenador Asuntu Ekonomia no Agrikultura, Estanislau Da Silva, hatete razaun la hola hare tanba dezintendimentu entre Ministru Agrikultura ho MCIA tanba ne’e mak hapara tiha sentru agrikultores sira ne’ebe atu hola hare povu agrikultor sira nian.

“Ha’u hakarak hatete ohin ba oin sentru servisu agrikulas sira mak hola tanba sira ema Bobonaro, sira mak hola no sira mak ba fan, lalika hein fali MCIA. Tanba dezentementu ne’ebe mak iha halo populasaun sira mak sofre hanesan agora,”dehan Estanislau.Nev

Jornal Nacional