Oscar Lima fahe esperiensia ba estudante IPC

DILI - Presidente Câmara Comércio e Industria  Timor-Leste (CCI-TL), Oscar Lima fahe nia esperiensia nudar emprezariu ba estudantes V trimentre Institusaun Profissional de Canossa (IPC),   Departamentu Gestaun Administrativu iha kampus IPC Canossa  Has-laran, tersa feira (12/05) semana kotuk. Oscar Lima iha nia palestra durante oras rua resin ne’ebe iha salaun enkontru IPC Has-laran ba estudantes 100 resin ne’e, nia konta tuir esperiensia wainhira hahu no durante ne’e sai emprezariu ida to’o sai prezidente CCI-TL.

Nia hateten katak atu sai emprezariu nebe diak tenke iha onestidade tanba save nebe mak atu lori ema atu sai emprezariu tenke hamosu kreatividade no onestidade. Tuir nia katak iha tinan 1978 hahu ho nia negosiu  kiik ida bainhira nia rende ba militar Indonesia sira iha momentu ne’eba. Nia hahu fa’an  café  ho ninia modalidade osan  Rp30.000 (rupiah ho rihun tolu nulu). Osan Rp30.000 ne’e baku ba dolar agora karik  $3.00 (dollar tolu).  

“Tan ne’e hau hateten ba ita boot sira katak tenke servisu  no tenke hanoin ba iha futuru labele mehi ba iha iha buat nebe mak ho valor nebe mak boot, maibe hanoin uluk ba iha mehi nebe mak iha tanba hau uluk brani ho osan Rp30.000 ne’ebe agora hanesan tiga dollar ($3) hodi sosa café faan,” katak nia. Nia afirma katak  bainhira atu sai ema nebe mak diak importante tenke brani, haraik an, onestu  hodi ba iha publiku. No  labele hatudu badalismu tanba save importante ba lori ema atu sai susesu mak tenke haraik an.

Oscar hein katak joven sira bele sai emprezariu ida diak ba iha futuru, sai emprezariu ba iha Timor Leste ho matenek neebe mak sira hetan hosi IPC. “Hau hakarak atu hatete tan katak imi tenke sai sarjana nebe mak kompletu tanba tuir esperiensia nebe ami hetan iha kampu servisu iha sarjana balun ho D3  (diploma III) maibe servisu diak liu halo komparasaun ba sira nebe mak sarjana nebe mak ho S1 (Strata satu),” katak nia. Tan ne’e importante tenke iha kreatividade hodi bele buka servisu labele uza sarjana tau iha bolsu la lori benifisiu nebe diak ba iha nasaun.

Nia mos husu ba iha estudante sira tenke uza oportunidade nebe mak oras ne’e iha atu bele uza tempu nebe mak iha hodi hadia mentalidade. Tanba joven sei iha tempu atu bele hadia moris tanba ne’e labele soe tempu ne’ebe mak mamuk tanba tempu ne’e osan mean. Lima husu ba iha estudante sira bainhira remata hosi IPC tenke sai ho mentalidade ida nebe mak atu hetan servisu hodi halo komparasaun ba iha sira nebe mak hetan oan servisu  durante tinan barak. Nia mos husu atu halo poupansa ba iha finanseiru hodi hamosu industria ruma no bele kria servisu ba iha joven sira ne’ebe mak dezempregu.

“ Hau husu ba iha oan sira atu bele tau osan hodi halo buat ruma, labele estraga osan arbiru no hamosu buat ruma  hodi halo kompetisaun ho emrpezariu sira hosi rai liur. Tanba bainhira la preparadu ho matenek nebe mak iha mak ita boot sira sei halo servisu  SD nian,” dehan Oscar. Nia mos enkoraja estudante IPC atu bele sai emprezariu hodi bele kria servisu ba iha joven sira. “ Ita boot sira bainhira sai emprezariu diak keta hanoin minstru, tanba bainhira ita boot sira la halo korupsaun sei sae kareta maibe halo korupsaun sei la sae kareta nebe mak iha,” katak  nia. 

Nia dehan, save nebe mak sai ema susesu tenke iha onestidade tanba bainhira laiha onestidade mak sei la lori ita ba iha susesu  no laiha konfiansa hosi ema seluk. “ Hau dehan ba alin sira tenke iha onestidade bainhira deve ema nia trigu ruma tenke selu labele bosok ema hodi ema bele iha konfiansa,” sujere nia. Iha fatin hanesan diretora IPC Madre Terezinha Gusmão  hateten katak IPC konvida Presidente Oscar Lima atu oinsa bele fahe esperiensia ba iha estudante sira atu sira bele iha hanoin hodi bele halo inovativu ba iha sira nia an no sira nia futuru.

“Ami hatene katak hanesan presidente CCI-TL ita hatene ona kona ba moris timoroan durante ne’e.  Tanba povu sei moris iha mukit nia laran tanba setor privadu mak importante tebes tanba bele halo mudansa ba iha moris povu,  joven no nasaun liu hosi setor privadu,” dehan nia.  Nia afirma katak estudante sira ne’ebe mak partisipa iha palestra presindente CCI nian hosi estudante V trimester hosi Departamentu Gestaun Administrative mak hanesan Komputer Engenering, Gestaun Administrativa  Engenering, Informatika Engenering.

Iha biban ne’e Marcos de Deus  nudar estudante hosi Informatika Engenering sente orgulho tebes ho palestra nebe mak aprezenta hosi Presidente CCI-TL ne’e. “Hau sente diak teb-tebes  tanba liu hosi  ninia aprezentasaun fo vantagen ne’ebe diak tebes ba ami sira nebe mak iha,” katak Marcos. Nia dehan liu hosi esperesnia ne’ebe mak iha,  sei hamosu negosiu  kreativiade  ne’ebe importante   hodi bele lori nia sai emprezariu bainhira remata edukasaun iha Institusaun Profissional Canossa. (BT)

Business Timor - Pedro