DIÁLOGU HO SÉ?

Matadalan - Editorial

Estadu la konsistente. Iha parte ida, estadu konsidera Grupu Mauk Moruk hanesan inimigu, maibé iha parte seluk estadu rasik nomeia Premiadu Nobel da Páz, Dr. José Ramos Horta atu fasilita diálogu entre Mauk Moruk ho estadu.

Estadu iha dalan kruzamentu ne’ebé la hatene tuir án atu ba loos ne’ebé. Nia (Estadu) divia konsistente ho ninia desizaun uluk katak mate ka moris Grupu Mauk Moruk hanesan inimigu estadu. Maibé, saida maka ita hatene no rona, estadu buka fali alternativu seluk atu rezolve kazu Mauk nian ne’e liu-hosi dalan diálogu.

Diálogu, ema hotu hakarak ida ne’e. Satan, ita Timor ne’e, ita nia kultura buka solusaun ba problema ida maka liu-hosi Nahe Biti Boot (diálogu). Prátikamente ita hatudu tiha ona. Ita konsege rekonsilia maluk pro integrasaun ne’ebé uluk diretamente no indiretamente hakanek maluk timoroan seluk ne’ebé luta ba independénsia.

Liga ba ida ne’e, la sala ida kuandu estadu loke án hodi diálogu ho Mauk Moruk tanba Mauk Moruk la halo sala grave kompara ho sira seluk. Kestaun maka nusa estadu la mantein diálogu hori uluk kedas? Sé uza maneira diálogu de’it karik, ita la gasta osan 2 miloens ba operasaun ne’ebé folin laek ne’e. Osan 2 miloens la’os osan ida ki’ik. Sé 2 miloens ne’e aloka ba verba seluk karik, nia kala rezolve netik problema sosiál balun.

Estadu hanoin katak 2 miloens ne’e bele rezolve problema Mauk Moruk maibé faktu ita haree katak estadu kria tan problema foun iha problema tuan nia leten. Hanoin ita hotu sei lembra hela. Iha operasaun ba Mauk Moruk ne’e, povu inosenti maka sai fali vítima. Povu ba sira nia natar mós tenki hetan torturasaun. Ba to’os mós laran rua-rua. Matadalan forsa nian mós tenki akaba ninia vida ba KOK nia atuasaun. Ba mai vila mós infrenta presaun mentál no psikolójiku oi-oin.

Tanba ida  ne’e, estadu tenki difini ninia pozisaun ho firmi. Labele bilim-bala. Tanba bainhira bilim-bala, estadu rasik sei hatun ninia dignidade no halo konfuzaun ba ninia án rasik no mós públiku. Pur-ezemplu, sé agora nia (estadu) permiti diálogu, Mauk Moruk atu mai diálogu ho sé? Estadu ka Xanana? Sé estadu, assuntu diálogu maka saida? Korupsaun no Injustisa? Korupsaun no injustisa ne’e Tribunál ninia problema. Tanba ne’e, tenki rezolve ho lei, la’os ho diálogu.

Sé mai diálogu ho Eis PM Xanana Gusmão kona-ba kazu passadu, buka malu to’ok hodi diálogu ba! Ko’alia diálogu tenki tau ba iha prátika para bele rezolve problema refere ho lalais. Nune’e, labele fó implikasaun liu-tan ba komunidade sira nia moris iha área operasaun Komandu Operasaun Konjunta (KOK) no minimiza kustu orsamentu operasaun ne’ebé la fó benefísiu ba estadu. Abrasu.