Produsaun Sosis Ikan ho Na’an Karau

Grupu Moris Mesak (GMM) hala’o treinamentu durante loron lima iha Suku Bairu Pité, Postu Administrativu Dom Aleixo, Munisípiu Díli, kona-ba produsaun sosis ikan no na’an karau, ne’ebé maka hetan tulun hosi Diresaun Jerál Indústria no Koperativa, Diresaun Nasionál da Indústria Bens de Konsumu, Departementu Indústria Alimentar hosi Ministériu Komérsiu, Indústria no Ambiente (MKIA).

Grupu Moris Mesak ne’ebé maka harii hosi Sra. Ligia Maria Ribeiro Ximenes iha loron 15 Jullu 2015, ho inisiativu foun hodi loke produsaun sosis ikan no sosis na’an karau hodi kompete mós iha merkadu.

Inisiativa Ligia Maria Ximenes hodi loke grupu ne’e maka hanesan mós meius ida hodi loke kampu de traballu ba ema hotu. Partisipante hamutuk na’in 10 hodi tuir treinamentu durante loron lima (5) kona-ba produsaun sosis ikan no sosis na’an karau.

Grupu Moris Mesak hetan ona apoiu hosi Ministériu Komérsiu, Indústria no Ambiente. Ho apoiu tomak ne’ebé grupu Moris Mesak hetan, Sra. Ligia ne’ebé maka hanesan treinadora ba produsaun sosis ne’e hatete “ba oin maka Governu tau matan nafatin mai ami, ami hakarak produsaun sosis ne’e halo eksportasaun ba rai liur no lori nasaun Timor-Leste nia naran hamorin iha mundu internasionál maske Timor hanesan nasaun foun maibé ita labele hatama de’it sosis sira hosi nasaun seluk mai iha ita nia rai laran, maibé ita mós tenki uza mekanismu oinsa halo sosis rasik no ita mós bele ona hatudu ba mundu seluk katak ita mós bele dezenvolve ita nia nasaun ida ne’e”.

Ligia hatutan tan katak partisipante na’in sanulu (10) nia maka hili diretamente tanba nia hakarak loke kampu de traballu. Molok atu tama ba serbisu produsaun sosis ne’e rasik, Sra. Ligia hala’o uluk treinamentu ba grupu ki’ik.

Ligia rasik hahú halo produsaun sosis ne’e iha tinan 2007 to’o 2015 ho nia família de’it. Maibé, depois de haree ema barak maka laiha laiha serbisu entaun nia rasik iha inisiativa loke tan grupu ki’ik ne’e hodi fahe matenek ba ema seluk.

Ohin loron Governu mós ajuda ona sira ho mákina rua (2). Mákina ida ense surisu no ida tesi. Sira hakarak halo surisu ne’e ba oin no hakarak  halo di’ak liu-tan hodi bele hatama ba iha loja sira iha Díli laran.

“Surisu ne’ebé maka ami halo sei la fó impaktu negativu ba konsumidór sira tanba ami produz surisu ida ne’e ho na’an ne’ebé foin oho (segar). Ami atu halo ami tenki istila hotu tiha maka ami foin halo atu nune’e bele kuidadu saúde. Ami halo surisu mós sempre uza masker, luvas para evita virus sira la bele kona,” Ligia haktuir.

Temperus sira ne’ebé uza ba halo sosis maka hanesan ajeite, masin midar, kuliraun, tua graun vasco, masin, masako, tepun tapioca, luru tahan, no puimenta ut.

Prosesu produsaun halo surisu maka primeiru na’an ten. Na’an ten ita presiza hamoos nia ten no faze halo moos, depois huu no habai halo maran, ko’a na’an halo ki’ik, tempra bumbu sira ne’ebé prepara ona ba na’an depois tau iha jeleira durante kalan ida depois hasai mai hodi ense ba na’an ten ne’ebé prepara ona.

Depois de hatama na’an ba na’an ten ne’e, komesa halo kuak oituan-oituan, hodi ba tamun fali nune’e na’an nia mina sai hotu ona depois ba habai iha loron no ikus liu hatama iha plástiku no lori ba tau iha jeleira hodi fa’an de’it ona.

Iha parte seluk, partisipante ou hanesan mós Xefi do Grupu ba Produsaun Surisu nian, Nancia Auxiliadora Ribeiro Ximenes hatete “durante loron lima (5) ami hala’o treinamentu kona-ba surisu na’an karau ho ikan. Senti serbisu ho kontenti no fleksibilidade tebes tanba entre ami nia grupu serbisu rona malu tebes. No ami iha kada grupu keta-ketak hanesan grupu kua na’an, grupu hamoos bumbu, grupu tempra, grupu tesi no ense surisu”.

Nia hatutan surisu ne’ebé durante ne’e sira produz ne’e konsege hatama ona iha loja sira maka hanesan Lider, Kmanek, Lita Store no seluk tan hanesan mós edifísius (kantor-kantor) sira ne’ebé maka order no sira bele lori ba.

Nancia esplika maske foin la’o maibé kuaze ema barak maka hatene ona Grupu Moris mesak no sira sei kontinua serbisu ba oin, atu nune’e sira lori ba hatama iha loja no edifísiu sira tanba produsaun surisu fó vantajen di’ak ba sira nia kliente sira hotu.

“Ami husu ba Ministériu do Komérsiu indústria no Ambiente atu suporta nafatin ami atu nune’e bele halo ami nia negósiu ida ne’e ba oin nafatin. Ami nia planu hakarak produsaun surisu la’o nafatin no fó vantajen di’ak ba ami no ami nia produsaun surisu ne’e labele iha ita nia rai laran de’it maibé ami hakarak atu halo eksportasaun ba rai liur atu nune’e ema mós bele hatene,” nia dehan. (Mj4)

Matadalan