PM Deseja Susesu Membru UNE-TL

Primeiru-Ministru (PM), Dr. Rui Maria de Araújo, Sesta (24/07), iha salaun Sosiedade Sivíl, Palásiu Governu, Díli, ofisialmente lansa partisipasaun Uniaun Nasionál de Eskuteirus Timor-Leste (UNE-TL), ba dahuluk iha Jamboree Internasionál 2015.

Iha tinan ida ne’e, Timor-Leste sei partisipa iha Jamboree International  ne’ebé maka sei hala’o iha sidade Yamaguchi, Japaun, hosi loron 28 Jullu-09 Agustu 2015.

Primeiru-Ministru ho onra no orgullu husik hela membru UNE-TL  ne’ebé reprezenta Timor-Leste iha Jamboree Internasionál 2015.

Primeiru-Ministru konvida Eskuteirus sira hotu atu haree partisipasaun Timor-Leste ninian iha kontestu importante tolu maka, primeiru; Timor-Leste partisipa hanesan nasaun Independenti, hanesan povu ne’ebé ezisti iha mundu rai klaran, no tanba ida ne’e sira ne’ebé reprezenta Timor-Leste labele halo moe Timor-Leste.

Segundu; partisipasaun reprezentante sira UNE-TL nian kuinsidi mós ho aprovasaun  formal ne’ebé Estadu liu-hosi Governu halo ba Uniaun Nasionál dos Eskuteirus de Timor-Leste liu-hosi rezolusaun ne’ebé aprova iha Konsellu Ministrus iha 21 Jullu 2015. Ida ne’e tau mós todan ba UNE-TL hotu-hotu nia kabaas atu lori fiar Estadu nian ida ne’e hala’o moviementu Eskutista iha Timor-Leste tuir duni Lord Baden Powell, Primeiru Fundadór Eskuteirus nia hanorin.

Terseiru; Movimentu Eskutista hanesan movimentu ida ne’ebé voluntariadu, forma ema nia karakter no eduka joven sira partisipa iha moris natureza nian. Ne’eduni, Primeiru-Ministru husu ba dirijenti sira atu iha vizaun ne’ebé klaru oinsá atu lori movimentu eskutista iha Timor-Leste ba oin no responsabilidade mós ba Caminheiros sira atu fó ezemplu di’ak nafatin ba Exploradores, Lobitos ho Avezinhas sira.

“Ha’u aprende Lideransa iha Eskutismu. Ha’u aprende oinsá serbisu iha ekipa liu-hosi  serbisu iha patrulla eskutizmu nian,” Primeiru-Ministru haklake.

Nia salienta ba Eskutas sira katak Eskutizmu hanesan eskola de formasaun di’ak ida ba joven sira hodi moris iha disiplina no ajuda malu bainhira infrenta difikuldades iha moris patrulla nian. Tan ne’e, vale apena moris iha eskutizmu tanba istória mundu hatudu katak iha parte barak mundu ninian ema sira ne’ebé liu-hosi movimentu eskutista hanesan eskutizmu estadu no eskutizmu katóliku ninian, sira barak  konsege ultrapasa barreiras no sai liders instituisoens boot iha Estadu nia laran.  Ne’e tanba Movimentu Eskutizmu hanorin eskutas sira hahú hosi ki’ik-oan kedas oinsá hatene ona disiplina, serbisu iha ekipa, ajuda malu,  no respeita malu.

Primeiru-Minisrtu mós salienta tan katak aspeitu importante iha eskutizmu la basta ativu de’it iha eskutizmu maibé tenke estuda, tenke matenek no tenkeser primeira pessoa hadomi natureza.  Eskuteirus ida normalmente sempre hakat ida iha ohin kompara ho ema sira ne’ebé la’os eskuteirus, tanba nia treinadu ona oinsá atu moris iha sosiedade nia leet.

Xefe Governu informa katak VI Governu sei fó apoiu tomak ba UNE-TL nia serbisu no kumpri nia responsablidadi kria kondisoens ne’ebé seidauk iha atu nune’e movimentu eskutista bele abansa ba oin.

Ikus liu, Primeiru-Ministru deseja votus de susesu ba Membru UNE-TL sira ne’ebé  sei partisipa iha Jamboree International 2015 iha Nasaun Japaun no husu ba membru UNE-TL atu buka halo kontaktus no estabelese rede de amizade ho Irmaun Eskutas iha paizes sira seluk hodi nune’e bele habelar liu-tan movimentu Eskutista nian iha Timor-Leste. (*)

Matadalan