Tijolu Kesi Promovidu iha TL

Produsaun Tijolu kesi hahú promove daudaun iha Timor-Leste tanba Tijolu Kesi ne’e rasik iha projetu implementasaun uma lima (5) iha Munisípiu Aileu hetan apresiasaun maka’as hosi Prezidente Repúblika.

Sekretáriu Estadu Polítika Formasaun Professionál no Empregu, Ilídio Ximenes iha serimónia abertura ba formasaun Tijolu Kesi iha sentru Formasaun Senae, Becora, Díli, foin lalais ne’e hatete Tijolu Kesi ne’e importante tanba ita nia formadór sira ne’ebé  maka iha esperiénsia uluk halo ona halo Tijolu no sira fó formasaun ba grupu hira iha Liquiça, Ermera no mós iha halo projetu uma lima (5)  Aileu.

“Ita tenki promove Tijolu Kesi, tanba rezultadu hosi formadór sira halo ona uma lima (5) iha Aileu ne’ebé hahú hosi fondasi to’o intrega xavi, sentru formasaun Becora rasik halo fali uma rua (2) iha Manatuto hosi fundasi to’o intrega xavi ne’e rezultadu hosi ita nia formadór sira,” Ilídio dehan.

Konselhu Ministru fó fiar ba Sekretaria Estadu Polítika Formasaun Professionál no Empregu (SEPFOPE) halo uma sanulu (10)—uma lima iha Aileu uza Tijolu (rai mutin ho rai mean) tomak no uma lima (5) iha Manatuto. Ida ne’e ho objetivu atu loke kampu de traballu tanba ida ne’e governu ho komitmentu boot atu suporta formasaun Tijolu Kesi atu komesa espalha ba teritóriu Timor tomak.

Aleinde ne’e, Koordenador SOVER, Celso da Fonseca hatete formasaun Tijolu kesi foin primeiravez hala’o iha fatin ida ne’e, tanba ne’e tenke utiliza oportunidade ne’e ho didi’ak atu nune’e bele hatutan fila fali ba oin.

“Tijolu Kesi ne’e labele para de’it iha Díli maibé kada munisípiu mós bele hala’o ona no tenki implementa liu-liu ba formadór sira, hanesan Don Bosco Fatumaca, Sentru formasaun Tibar, Senae no grupu hosi Lekidoe nian,” nia haktuir.

Iha fatin hanesan, estudante João da Costa informa katak formasaun ida ne’e signifika boot tebes. Ida ne’e hanesan oportunidade di’ak tebes ba formandu sira atu bele aproveita oportunidade ne’e hodi halo kapasitasaun hodi halo produsaun Tijolu iha formasaun ida ne’e.

“Ha’u haree katak ida ne’e hanesan passu pozitivu ida ba formasaun ida ne’e no mós ba joven sira liu-liu ita ko’alia kona-ba dezempregu hanesan timoroan barak ne’ebé seidauk hetan oportunidade serbisu, tanba problema profisionalizmu iha área sira entaun oportunidade loke Tijolu ida ne’e loke ona dalan ba joven sira ne’ebé  maka la hetan serbisu,” nia dehan. (Mj4)   

Matadalan