Rahun sira ne’ebé hetan pertense ba Boeing 777 ida

Númeru parsiál ida ne’ebé hetan iha rahun sira ne’ebé hetan iha illa ida iha Índiku permiti ona konfirmasaun katak hanesan parte balun hosi Boeing 777 ida, aparellu ida hanesan ho Malaysia Airlines ne’ebé lakon iha fulan 16 liubá ho ema na'in 239 iha aviaun laran.

Konfirmasaun hatete katak aviaun rahun sira ne’ebé hetan iha illa franseza Reuniaun, iha oseanu Índiku, pertense ba Boeing 777 ida - modelu aviaun ida hanesan ho ida  ne’ebé lakon iha fulan 16 liubá ho ema na'in 239 iha aviaun laran - fó sai iha loron-sesta dadeer hosi visi-ministru Transporte malaiu nian, Abdul Aziz Kaprawi, ho baze iha informasaun ida ne’ebé transmiti hosi responsável sira Malaysia Airlines nian.

"Númeru parsiál ida konfirma katak (aviaun rahun sira) pertense ba aviaun Boeing 777 ida. Informasaun ne'e mai hosi Malaysia Airlines. Sira rasik maka informa ha'u", Kaprawi ko'alia ba ajénsia France Presse. Aviaun malaiu hanesan modelu úniku ida ne’ebé maka monu iha Pasífiku foin lalais ne'e.

"Ha'u fiar katak ita hakbesik ona hodi rezolve mistériu hosi MH370. Aviaun rahun sira nebe hetan ne'e bele sai hanesan sasin evidente ida katak MH370 monu iha oseanu Índiku", nia hatutan.

Autoridade australianu sira halo daudaun operasaun ne'e indika katak deskoberta hosi aviaun sira ne'e labele halo mudansa iha operasaun sira ne'e.

"Ha'u la fiar katak deskoberta ne'e sei permiti hodi hamenus área operasaun nian. Liutiha ona fulan 16 hahú hosi aparellu aéreu nia lakon, rahun sira ne'e halo ona viajen naruk, nune'e ha'u hanoin katak sei bele deskobre hosi ne’ebé maka rahun sira ne'e mai", deklara hosi visi-primeiru-ministru australianu Warren Truss.

Illa Reuniaun situa iha distánsia kilómetru 4000 hosi área ne’ebé investigadór sira kontinua fiar katak hanesan fatin ne’ebé Boeing 777 monu.

SAPO TL ho Expresso – foto EPA@ Raymond Wae Tion