Timor-Leste karik sei hetan estatutu observadór iha ASEAN iha tinan ne'e

Timor-Leste karik sei hetan estatutu nu'udar observadór iha Asosiasaun hosi Nasaun sira Sudeste Aziátiku (ASEAN) iha tinan ne'e, hatete hosi kordenadór Asuntu Ekonómiku sira no ministru Agrikultura no Peska nian, Estanislau da Silva.

Nasaun foun iha Sudeste Aziátiku ne'e aprezenta ona kandidatura ofisiál ba ASEAN iha tinan 2011, maibé Singapura - hanesan Estadu-membru úniku maka hatudu dúvida -, defende katak tenki akontese de'it iha tinan 2015.

Maibé, tuir governante timoroan, agora sei simu de'it estatutu nu'udar observadór, iha konkretu ba simeiru fulan-Novembru iha Malázia, nasaun nebe ho prezidénsia rotativu.

Estanislau da Silva, nebe ko'alia ba ajénsia Lusa durante vizita ofisiál ida loron tolu iha Indonézia, vizita nebe dirji hosi primeiru-ministru, Rui Maria de Araújo, no iha mós prezensa hosi ministru na'in neen seluk, haktuir hosi fonte diplomátiku sira no hosi ema sira nebe iha ligasaun diretu ho ASEAN.

Ministru rekoñese ona katak nasaun "tenki prepara buat barak hodi prenxe kritériu sira" nebe ASEAN husu.

Fonte ida hosi Ministériu Negósiu Estranjeiru sira timoroan nian konfirma ona ba Lusa katak Timor-Leste seidauk iha estatutu formál nu'udar observadór, pertense de'it ba Fórum Rejionál ASEAN nian, hanesan Índia, Japaun, Kanadá ho Rúsia.

Fonte hanesan hatete katak Timor-Leste hili hodi laiha estatutu observadór nian, hanesan estatutu nebe Papua Nova Guiné iha, partisipa nune'e iha reuniaun sira ASEAN nian nu'udar "konvidadu espesiál".

Bainhira Lusa husu iha fulan-Janeiru ba embaizadór Singapura nian iha ASEAN, Tan Hung Seng, nia la hatete loron ida, maibé nia hatete de'it katak iha tempu nebe ASEAN prepara hodi estabelese zona komérsiu livre ida nian iha loron 31 fulan-Dezembru tinan ne'e, "hanesan importante atu sai hanesan organizasaun ida nebe ho baze iha regra sira".

Relasiona ba kritériu sira avaliasaun kandidatura sira ba ASEAN, nebe halibur área ekonómiku, sosio kulturál no polítiku no seguransa nian, Timor-Leste sei hetan daudaun análize.

Iha fulan-Janeiru mós, Shahriman Lockman, analista hosi Institutu Estudu Estratéjiku no Internasionál sira hosi Malázia, hatete ba Lusa katak nasaun fundadór sira hetan ona lisaun ida ho Birmánia nia entrada, tanba problema sira "sei sai mós hanesan ASEAN nia problema sira".

Shahriman Lockman esplika katak kriasaun ba Komunidade Ekonómiku ASEAN nian iha fulan-Dezembru sei aprezenta asosiasaun ida ho velosidade rua, tanba Kamboja, Laos, Birmánia no Vietname sei partisipa de'it iha akordu komérsiu livre iha 2018, tanba ne'e, importante ba ASEAN "tau orden iha uma laran" antes aseita membru foun ida.

ASEAN, nebe iha Estadu-membru hamutuk sanulu hahú hosi loron kriasaun nian iha 08 fulan-Agostu 1967, nia objetivu prinsipál sira maka promove kresimentu ekonómiku no estabilidade iha rejiaun.

SAPO TL ho Lusa