Polisia kontinua buka tuir Lemorai-Sunardy

DILI - Polísia  Nasionál  Timor Leste (PNTL) kontinua buka tuir membru Paulino Gama Mauk Moruk nain rua Lemoray ho José Sunardy ne’ebé  mak sei halai lakon.

Komandante Jeral PNTL Komisiariu Julio da Costa Hornay dehan, membru MM nain rua ne’e responsavel Polísia  nian bajeia ba mandadu de kapturasaun hosi Ministeriu Publiku (MP) mak Polísia  tenki ejekuta ninia ordem.

“Ami simu ona mandadu de kapturasaun ne’e Polísia  nia misaun atu ejekuta ordem,” dehan Julio ba Jornalista iha Akademia Polísia  Komoro Kuarta  (26/08).

Nia realsa, sira mós nudar Timor oan sala ne’e la’ós  sira nain rua de’it  mak halo ema moris ne’e la iha ida mak prefeitu nudar ema Umanu mais Kuandu sala tenki responsavel ba sala ne’ebé  mak halo tuir lei ne’ebé  mak vigor iha nasaun ne’e.

“Iha mandadu kapturasaun signifika Polísia  kontinua buka tuir fulan ida ka rua tinan ida ka tinan sanulu ita buka nafatin aprosima para lori ita nia maun alin sira ba iha dalan Justisa nian,” dehan Julio.

Entertantu, kona ba sira ne’ebé  mak halo krimi iha Operasaun nia dehan, se krimi ona ne’e tenki responsabiliza se nia viola artigu ruma ne’e lei nain sira mak orsida determina.

“Depende asasun ne’ebé  mak nia halo kontra artigu ida ne’ebé  nia pena saida ita sei hetan nia rejultadu oinsa,” dehan Julio. (Way)

Timor Post