GOVERNU EMPRESTA TAN MILIAUN $50 HOSI XINA

DILI - Governu liuhosi Konsellu Ministru fó ona autorizasaun ba Ministériu Finansas asina akordu ho ASIAN Bank hosi Xina hodi empresta tan osan hamutuk miliaun $50 hodi finansia projetu drainajen iha kapital Dili.

“Governu Timor Leste ho ASIAN Bank hosi Xina iha ona konkordánsia, para governu atu halo impréstimu  ho montante orsamentu hamutuk miliaun $50 hodi finansia projetu drainajen iha Dili laran,” Vise Ministru Finansas, Helder Lopes informa ba jornalista sira iha PN, Kuarta (02/12).

Iha fatin hanesan, membru hosi Bankada Partídu CNRT, Arão Noe hatete, konkorda tebes ho polítika governu nian ne’ebé atu impresta tan osan miliaun $50 hosi ASIAN Bank hois Xina.

“Parte ha’u nian konkorda tebes tanba razaun fundamental mak ne’e, sé ita iha empréstimu ho funan ki’ik, ita nia osan ne’ebé tuir los ita hodi halo estrada ne’e ita rai hela iha banku, depois estrada ne’ebé halo ho osan ne’e ita uza dau-dauk ona, tinan 10 mai mak ita hahú  selu, mezmu estrda ne’e ita halo agora, tinan rua, tolu mai ita uza tiha ona, ne’e hatudu katak ita nia osan ne’ebé rai hela iha banku ne’e, funan dau-dauk ona, to’o momentu tinan 10 mai atu selu, ita selu ho nia funan ona, la selu nia isin,” Arão hatete.

Iha parte seluk, membru bankada FRETILIN, Joaquim do Santos, hatete, nia parte la-konkorda ho polítika governu nian ne’e. “Ita bele ba halo impréstimu  hosi estranejeiru mais tenke mai halo investeimentu iha rai laran para lori lukru, sé deve mai gasta halo estrada depois lori fali osan mina rai selu, ne’e la-bele,” dehan Joaquim.

Tuir reprezentante povu ne’e katak, kuandu governu kontinua impresta osan ba iha rai liur maka aban bainrua jerasaun foun sira maka sei selu la’ós  governu ne’e maka selu.

“Tanba ne’e dezde uluk kedas ha’u la-konkorda governu halo deve tanba la-lori retornu,” Joaquim kestiona.(jos)

Timor Post