MI ORIENTA KOMJER FOTI MEDIDAS BA MEMBRU TA MARIO

DÍLI - Ministru Interior (MI), Longuinhos Monteiro fó ona orientasaun ba Komandante Jerál Polísia Nasionál Timor-Leste (PNTL), Komisáriu Júlio da Costa Hornay hodi bele foti medidas forte ba membru Korpu Seguransa Pesoál (CSP) ho naran inisiál JV ne’ebé maka tá katuas Mario Soares ho idade (64).

Ministru Longuinhos Monteiro dehan, problema ne’e Komandante Jerál hato’o ona ba nia, tanba ne’e maka nia fó ona orientasaun ba komandu hodi bele foti medidas forte ba membrus ne’ebé maka halo agresaun fiziku ba komunidade.

“Ida ne’e kestaun Komandu iha gestaun disiplinar. Polítika klaru ita sobrevivénsia  atividades ne’ebé maka komandu hala’o, komandante jerál mós informa ona mai ha’u kona-ba situasaun ida ne’e. ha’u fó orientasaun tenki foti medidas forte karik kazu ne’e justifika klaru ninia intervensaun ne’e lori individu, privadu ka lori kompaña nia naran ne’e tenki halo investigasaun,” dehan eis komandante Jerál ne’e ba Jornalista iha Parlamentu Nasionál, Kuarta (02/12).

Nia hatutan, fiar katak komandu hala’o hela investigasaun profunda kona-ba kazu refere.

Iha fatin hanesan, Deputadu hosi Bankada Frenti Revulusionáriu Timor-Leste Independente (FRETILIN), Eládio Faculto dehan, bainhira haree maka situasaun normál hela maka ba tá de’it ema ne’e labele, ne’e krimi tenki halo investigasaun para hatene loloos kazu ne’e kauza sai ida.

“Ita tabelei nonók ba aktu ne’e. Ita tenki halo investigasaun profunda ba kazu ne’e hodi ita bele hatene loloos kauza kazu ne’e nian,” dehan Faculto.  

Parte seluk, Komandante Jerál PNTL, Komisáriu Júlio da Costa Hornay informa, kazu membru PNTL hosi CSP baku katuas Mario Soares ne’e prosesu investigasaun la’o hela.

“Sira mai iha ne’e ha’u hatun ona despaisu hodi loke prosesu. Ita sei haree hosi vítima, sasin no suspeitu to’o tiha ne’ebá maka ita haree nia konklusaun loloos,” dehan Júlio iha Kuartel Jerál PNTL, Kaikoli, Kuarta (02/12).

Nia hatutan, buat hotu labele foti medidas de’it maibé tenki haree tuir porsedimentu legál nian, foin bele kondena ema ne’e sala ga loos, hein rezultadu investigasaun maka bele kastigu nia.(Way)

Timor Post