Kontratu Governu-Hyundai Iha Irregularidade, Guilhermino: “Ami Rezeita Vistu Husi Governu”

DILI - Prezidente Tribunal de Contas Guilhermino da Silva, rekuza no rezeita, desizaun vistu priviu ba kontratu entre governu ho kompania Koreana Hyundai, tamba iha iregularidade barak, maibe governu rekore, neduni kazu nee agora suspende hela.

Lia hirak nee hatoo husi Prezidente Tribunal de Contas Guilhermino da Silva, ba jornalista sira, hafoin remata Aniversariu Sentru Formasaun judisiariu ba dala 13, iha Sentru Formasaun, Caicoli, Dili, Kinta (03/12/2015).

Konaba vistu Prosesu tenderizasaun Suai Supply Base nee ami foti dezisaun tiha ona, dezisaun nee ami rekuza no rezeita desizaun vistu priviu ba kontratu entre governu ho kompania Koreana Hyundai,” hateten Guilhermino.

Nia hatutan husi governu rekore, maibe juiz ihaTribunal Recursu hare ba Tribunal de Contas nee iha Juiz nain 3 deit, tamba nee la iha tan juiz seluk atu atende, entau kazu nee suspende hela, tamba lei bandu Juiz neebe deside tiha ona, la bele repete  tan dala ida.

Iha parte seluk Peskizador ONG Lao Hamutuk Juvinal Dias hateten tuir sira nia hanoin Tribunal de Contas iha direitu atu husu responsabelidade estadu ida nee, ezemplu se kontratu liu ona tokon ida ba leten, tribunal tenki fo vistu, se karik iha kontratu ruma neebe la iha vistu husi Tribunal nee katak iha iregularidade. Informasaun kompletu iha STL Jornal no STL Web, edisaun Sesta (4/12/2015). Joao Anibal/ Domingas Gomes

Suara Timor Lorosae