CNRT DUVIDA POLITIKA POUPANSA RUI ARAUJO

DILI – Bankada partidu CNRT iha Parlamentu Nasional lansa atake ida hasoru Primeiru – Ministru, Rui Maria de Araújo  kona-ba polítika  poupansa ne’ebé  laiha balansu, tanba realidade hatudu saláriu  asesor sira iha Gabinete Primeiru – Ministru (GPM) nian liu fali membru órgaun  soberanu.

Deputada bankada CNRT, Carmelita Caetano Moniz hatete, saláriu  vensimentu no bens de servisus li-liu iha GPM nian a’as tebes to’o lalehan.

Deputada Carmelita, ladun kompriende ho argumentu katak objetivu oinsa atu reduz no halo poupansa. Ida iha rúbrika  orsamentu ne’ebé  alokadu ki’ik ba Cathering,maibé iha fatin seluk aloka orsamentu ne’ebé  a’as ba rúbrika  ho item ne’ebé  tuir loloos bele kria injustisa sosial ba saláriu  sesor nasional no internasional. Orsamentu ne’ebé  aloka ba kategoria saláriu  no vensimentu no bens servisus a’as, tanba rekrutamentu ba asesor internasional no nasional.

“Senhor Primeiru – Ministru, ita bo’ot nia asesor hamutuk 29. Nain tolu internasional no restu Timoroan de’it. Ha’u louva ba ida ne’e, tanba ita hahú  ona polítika  Timorizasaun iha area asesoria. Maibé, ha’u nia lia menon ita tenke tetu hikas fali sira nia saláriu  bazeia ba sira nia kapasidade no esperiénsia ne’ebé  mak sira iha,” Deputada Carmelita levanta kestaun ne’e sesaun debate Orsamentu Jerál  Estadu (OJE) ba tinan fiskal 2016 iha Parlamentu Nasional, Dili Tersa (02/12).

Hatan kona-ba kestaun ne’e, Primeiru – Ministru, Rui Maria de Araújo  esplika loos duni iha preokupasaun la’ós  mai hosi  de’it deputada Carmelita Caetano Moniz, maibé hosi  mos membru governu balun.

Nia hatutan, kona-ba asesor sira ne’ebé  iha GPM nomos kestaun ne’ebé  ligadu ho sira nia saláriu  no injustisa sosial katak kestaun ida dependensia ba naun-funsionariu publiku iha administrasaun publiku ne’e sei bo’ot tebes. Kuandu hare didiak lista pagamentus hosi  Ministeriu Finansas durante Outubru nia laran de’it iha ema nain 850 iha administrasaun publiku hotu mak la’ós  funsionariu publiku. Ema sira ne’e kada fulan Estadu tenke gasta osan hamutuk millaun US$millaun US$ 2.6.

“Infelizmente lista saláriu  ne’e lahanesan. Saláriu  asesor iha instituisaun balun bo’ot tebes, maibé ha’u lakohi temi instituisaun ne’e nia naran no ida ne’e problema ida duni,” rekonhese PM Rui.

Atu resolve problema saláriu  asesor, tuir PM Rui katak governu aprova tiha ona dekretu governu idaatu regula saláriu  bacontratos a termo certo e administracao publica.

“Ha’u hakarak atu fo emphaze katak cathering ka hahan ne’e nu’udar ijemplu ida de’it hosi  kestaun poupansa. Governu ida ne’e promove poupansa la’ós  de’it iha area cathering, maibé iha kestaun sira seluk. Inklui mos utilizasaun kombustivel ba karreta Estadu, manutensaun ba patrimoniu Estadu. Li-liu ba buat hotu ne’ebé  iha ligasaun ho ben no servisus no buat hotu ne’ebé  tama iha despezas super flu,” klarifika PM, Rui.(oki)

Timor Post