Reseitas
mina matan Bayu Undan sei tun drastikamente to’o tinan 2022.
“Ita
sei hetan osan mais de bilaun 1 USD deit, posu foun iha area Joint Petroleo
Development Area (JPDA) no area exklusiva seidauk deskobre. Maske iha Estudo
balun hatudu katak iha ona posu lubuk ida, maibe seidauk hatene bainhira maka
halo esplorasaun. Posu balu ne’ebe hetan ona, seidauk halo perfurasaun tanba
kompania mina ladun iha interese atu investe, tanba kustu bot no mina nia folin
tun. Investimento fundo minarai iha merkadu finanseira mos iha risku maka’as no
iha 2015 ne’e lakon osan lubun ida,” deklara Xefi Bankada FRETILIN, Aniceto
Guterres ne’ebe mak aprtezenta deklarsaun politika iha aprezentasaun OJE 2016
nian iha Parlamentu Nasional, Tersa (01/12/2015).
Xefi
bankada ne’e haktuir tan, kampu Greater Sunrise mak projeto ida kontinua la iha
serteza, tanba kapasidade negosiasaun la sufisiente no sei iha aspeto legais no
política lubuk ida mak tenke konsidera, aumenta tan ho problema fronteiras
marítima nian halo situasaun incerteza liu tan. La hatene bainhira maka ita
bele dada pipeline mai ita nia rai, maibe Projeto bot Tasi Mane avansa dok liu
tiha ona.
Nia
dehan, imprestimu hanesan fonte rekursu ida ba financiamento despesas ba
infraestruturas basicas, maibe hamosu tusan ka divida ne’ebe maske nian funan
ki’ik liu, futuramente tenke selu. Tinan-tinan divida publika aumenta ba
bei-beik.
“Tuir
plano Governo nian, to’o 2020 Timor-Leste sei halo dividas publicas hamutuk $
1,113,4 milhoes. Politika dividas ita opta, tanba dividas ne’e konsesional ho
taxa de jurus ki’ik liu, maibe to’o tinan 2020 taxa de jurus aumenta ho capital
ne’ebe ita deve, sai bot liu ona. Governo seidauk iha plano ne’ebe forte no
sustentável katak investimento husi divida ne’e, hetan retornu no husi retornu
selu fali dividas ne’e, la’os selu fali husi fundo minarai. Atu nune’e ita la
tau fundu minarai iha risku ne’ebe as liu tan,” Aniceto Guterres dehan tan.
Nia
afirma katak, reseitas domestikas mos la hatudu situasaun ne’ebe diak liu iha
tinan ida ne’e no iha futuru. Reseitas domestikas ki’ik teb-tebes kompara ho
reseitas petrolíferas no continua ki’ik.
“Tinan-tinan
sa’e ka iha duni aumento, maibe sae neneik tebes no aumentu ne’e entre milhoens
1 to’o 2 USD deit. Ho politika reforma iha gestão ekonómika no finanseira
ne’ebe Governo introduz dadaun ne’e, Governo preve ona katak komesa 2017-2020
sei iha aumento kada tinan entre 9-10 milhoes dólares,” hateten Aniceto
Guterres.
Maske
nune’e, to’o 2020 total reseitas domestisas seidauk bele kobre despezas
rekorentes, to’o salarios no vencimentos mos seidauk bele taka hotu. To’o ohin
loron faktus hatudu ona katak tinan-tinan reseitas domesticas nunka atinji
saida mak previsto iha OJE. Situasaun hanesan ne’e obriga ita recore ba RSE no
leventamento excessivo hosi fundo minarai, ka halo imprestimo.
Situasaun
kona ba fontes rekursu ba finansiamento hirak ne’e, tuir Aniceto, hatudu katak
fundo minarai iha medio prazo hasoru risku ne’ebe as tebes. Situasaun ida ne’e
mos obriga ita tenke hanoin ona oinsa asegura sustentabilidade orsamental iha
medio no longo prazo li-liu 2022 ba oin.
Governu
mos konsiente no preokupa ho situasaun hirak ne’e. Ne’e duni maka halo Governo
trasa política ka estratégia de antesiupasaun da despesas (frontloading) no
introduz dadaun ona reforma balu iha nível jestaun ekonomika no finanseira
hanesan, reforma judicial no harmonizasaun legislativa, reforma iha
Administracao Publica, reforma Economica no reforma fiskal, reforma gestão do
desempenho no reforma desempenho orsamental.
Ho
estratégia de antecipação da despesas, Governo sei halo levantamento excessivos
husi fundo minarai hodi investe iha projetos de alta qualidade hanesan
infraestruturas no desenvolvimento de capital humano ne’ebe mak sei lori
efeitos duradouro iha economia.
Governo
fiar katak investimento hirak ne’e maka sei estimula kresimentu ekonómiku no
gera reseitas fiskais barak liu tan no hamenus despesa publica iha longo prazo,
no fim permite elimina gradualmente levantamento excessivos.
“Estrategia
ne’e diak, maibe ita bele iha esperanca bainhira halo investimento ida ho
prudência no equilibrado iha área chaves, la’os deit infraestrutura no
educação, maibe tenke investe mos iha agricultura no saude, no investimento
hirak ne’e lori duni retorno económico no social maka’as, wainhira investimento
privado barak liu ona investimento publiku,” afirma Deputadu Aniceto Guterres.
To’o
agora, Investimento publico barak ona maka ita halo, maibe problema mak oinsa
nia retorno ne’ebe ita hotu hein. Governo rasik seidauk iha mekanismo ida forte
atu maximiza retorno por kada dólar gasto. Hanesan, seitor eletricidade nia
reseitas nudar retorno económico sei uitoan tebes compara ho investimento
ne’ebe halo tiha ona, nem bele taka despesas de manutensaun no fornesimentu
combustível.
Osan
bar-barak mak Tinan-tinan aloka ona ba seitor infraestrutura basicas, maibe
seidauk hatudu resultado ne’ebe mak diak no maximu. Projetos barak mak nia
kusto exagerado kompara ho volume projeto li-liu iha projetos plurianuais,
tanba ne’e mak resultado uitoan deit, at lalais tanba laiha qualidade, nune’e
osan barak habokur deit kompania ho nia mafia sira.
Situasaun
ne’e kontinua maske Governo hamosu tiha ona ADN atu halo avaliasaun no
monitoriza implementasaun kada projeto. Hatudu katak ita seidauk iha sistema
kontrolu ida forte atu asegura kualidade projeto. Ita hein katak reforma hirak
ne’ebe Governo hala’o ne’e bele mos fo solsaun ba problema hirak ne’e hodi
garante suceso ba Governo nia política de antecipação da despeza.
Problema
seluk iha área infraestrutura ne’ebe considera seriu, maka sistema manutensaun
ne’ebe inklui mos manutensaun ba património Estado hanesan kareta no buat
seluk. Ne’e la’os deit tanba problema gestão, maibe mos tanba recursos humanos.
Hanesan dala barak ita hare estrada hetan ko’ak ka at iha parte balu, la hadia
kedas, maibe hein to’o estrada ne’e at total ona maka halo fali estrada foun.
Se la sala, iha OJE 2016 la tau osan ba manutenção rutina ba estradas no
pontes. Karik ita hein tinan tolu hat mai wainhira estrada no pontes at total
ona maka ita atu halo fila fali foun.
Iha
area Educacao nudar seitor xave ba desenvovimento capital humano, ita mos halo
ona investimento barak, maibe ki’ik liu kompara ho investimento iha area
infraestrutura.
“Ita
nia politika edukasaun gratuita halo labarik barak liu iha Timor-Leste maka
hetan asesu ba prosesu aprendizagem, maibe barak mos seidauk hetan facilidades
adekuadu ba aprendizagem, hanesan material didaktica, karteira, biblioteca no
falta profesores kualifikadu. Hare ba taxa partisipasaun labarik sira iha eskola
tinan-tinan aumenta, maibe atu hetan kualidade edukasaun ne’ebe diak, sei dok
tebes husi ita hotu nia expectativa,” Deputadu Aniceto kestiona.
Politika
kona ba língua de ensino mos sai faktor determinante ba kualidade edukasaun iha
Timor-Leste.
Tanba
ne’e, aleinde hadia política kona ba língua de ensino, ita tenke investe barak
no barak liu tan, hanesan paíz sub desenvolvimento sira seluk ne’ebe investe
barak iha seitor educação hanesan Indonesia aloka osan 20 % husi OJE ba
edukasaun, Nepal 21%. Maibe, Timor-Leste nia investimento iha edukasaun
tinan-tinan varia ho media 9 % deit, enkuantu situasaun edukasaun Timor-Leste
nian pior liu rai hotu iha sudeste Asia.
OJE
2016 nian la refleta política de antecipação da despesa ne’ebe atu investe
barak iha desenvolvimento capital humano hanesan mos seitor edukasaun, tanba
orçamento ba educação representa 8 % deit. Ho investimento ki’ik hanesan ne’e
difisil tebes atu ita hadia kualidade educação ida ne’ebe diak, no fim
determina kualidade capital humano no garante ba trabalhadores qualificados atu
compete iha mercado de trabalho Nacional ka ASEAN.
Seitor
Agricultura la tama hanesan seitor ida ne’ebe atu hetan investimento iha
política de antecipação da despeza husi Governo. Maibe seitor ida ne’e
potencial tebes atu hamosu posto de trabalho no loke oportunidade ba
diversificação economia através substitucao importações ho exportações iha
mercado regional ne’ebe diak.
Realidade
hatudu katak maioria povu moris iha área rural no sira moris ho agricultura.
Nune’e investimento iha agricultura bele tulun povu maioria hodi kore sira husi
kiak no garante segurança alimentar no hamenus mal-nutrisaun iha ita nia rain.
Governo
investe barak ona iha seitor ida ne’e, hodi hadia infraestruturas, fahe fini,
fahe trator no equipamentos oi-oin, fila rai gratuita no programa, maibe nia
desempenho iha economia nao-petrolifera uitoan los. Ita sei importa fos husi
rai liur atu asegura segurança alimentar. maske nune’e, nudar seitor ne’ebe
importante no estratégico atu hadia economia Nacional ita precisa investe barak
liu tan.
Relativamente
ba reformas ne’ebe Governo introduz tiha ona, ita hein katak reforma sira ne’e
hadia eficiência no eficácia iha despeza publica tuir objetivos ne’ebe Governo
defini ona.
Ida
ne’e maka analisa no reflesaun kritika husi Bancada FRETILIN, nudar bancada
oposição, ba OJE 2016 nian, hanesan contribuição ida atu asegura
sustentabilidade orsamental iha medio longo prazo, hametin base ekonomia no
hametin Estado Timor-Leste. Ita hotu sei hamutuk nafatin hasoru desafiu sira
ohin nian no iha oin mai, no lori Timor-Leste ba dalan los desenvolvimento no
moris diak ba povu tomak. mia
Jornal
Nacional
Sem comentários:
Enviar um comentário