LAIHA AMBULÁNSIA, TULA MORAS IHA KAROSA TO’O MATE

Prezidenti Repúblika Taur Matan Ruak Segunda feira (15/2) kontinua hala’o diálogu aberta ho komunidade sira, iha Suku Taraco, Postu Administrativu Railaco, Munisípiu Ermera.

Diálogu komunitária ne’e kontinuasaun husi programa vizita Prezidenti Repúblika (PR) nian iha suku sira iha territóriu Timor Leste (TL) tomak ne’ebé mak nia halao tiha ona iha tinan hirak kotuk ne’e.

Ho vizita Xefi Estadu nian iha suku sira iha Ermera ne’e hamutuk sukus 400 mak nia vizta ona. Maibé liu husi nia vizita ne’e, komunidade sira levanta problema nukleu sira ba Xefi Estadu, hanesan la asesu ba eletrisidade, laiha beemos, laiha Estradas, laiha fasilitadades no profesional saude, problema edukasaun no selu-seluk tan ne’ebé mak sai lor-loron komunidade sira infrenta iha baze.

Iha suku Taraco, Postu Administrativu Railaco, Munisípiu Ermera, komunidade levanta problema konaba laiha kareta ambulánsia atu tula pasajeirus, nune’e komunidade obrigadu tula moras ida iha karoxa, maibé tuir dalan, seidauk to’o iha sentru saude moras ne’e mate tiha ona iha dalan klaran.

“Ami iha ne’e, iha tempu liu ba, bainhira inan sira atu partus, ami tula ho gerobak, tanba iha ne’e ambulansia laiha. Maibé to;o iha dalan klaran inan feton ne’e mate iha dalan klaran”, informa Rizanto Lekiloe Soares husi suku Taraco ne’e iha diálogu komunitária Prezidenti Repúblika iha Suku Taraco.

Rizanto Lekiloe Soares haklaken katak, distánsia suku Taraco ba sentru saude iha Postu Administrativu Railaco ne’e kuaze kilometru rua, wainhira la’o ain atu bele halo tratamentu.

Nia hatutan tan katak, triste tebes ba sira, tanba dala barak ona mak sira obrigadu tula pasiente iha karosa hodi lori ba sentru saude, maibé ida konsege mate iha dalan klaran.

Maibé Rizanto Lekiloe dehan, depois akontesimentu ne’e, Governu foin estabelese postu saude ida iha suku refere, maibé triste nafatin maka laiha fatin ba pesoal saude atu hela.

Hatán ba preokupasaun ne’e, Prezidenti Repúblika Taur Matan Ruak hateten katak, saúde no edukasaun sai problema bo’ot iha territóriu Timor laran tomak.

“Iha Suku 392 ne’ebé ha’u vizita ona, hot-hotu levanta problema hanesan, li-liu kona-ba saúde no edukasaun,” dehan Taur Matan Ruak.

Maibé Taur Matan Ruak dehan, Governu agora dada’uk esforsu atu halakon problema saúde nian ne’e, liu husi programa saúde iha familia.

PR Taur Matan Ruak hateten katak, uluk buat hotu kaman tanba liafuan ita, agora buat hotu todan tanba liafuan ha’u, ita la presiza ona.

PR Taur Matan Ruak dehan, dezenvolvimentu ne’e, Estadu labele halo Suku balun anak emas, no suku balun anak tiri, dezenvolvimentu tenke la’o hanesan.

Xefi Estadu ne’e dehan, komunidade sira iha nia rai moris fatin (Baguia), protesta katak, Prezidenti Repúblika ema Baguia oan, Prezidenti Parlamentu ema Baguia oan, Prezidenti CNE mós ema Baguia oan, maibé estrada ba Baguia, loke taka.

Maibé Taur Matan Ruak esplika katak, dezenvolvimentu ne’e, tenke la’o hanesan ne’e, tanba Estadu labele halo buat hotu dala ida.cos

Jornal Nacional