Disionáriu dahuluk ho lian Portugés-Tetun aprezenta ona iha loron-kinta ne'e

Disionáriu timoroan dahuluk hosi lian Portugés-Tetun aprezenta tiha ona iha loron-kinta ne'e iha Díli no elabora hosi ekipa ida ho ema na'in 12 hosi Departamentu Portugés nian hosi Universidade Nacional de Timor Lorosa'e iha tinan haat ikus ne'e. 

"Disionáriu antigu sira la tuir tetun padronizadu no ida ne'e tuir tetun padronizadu hosi Institutu Linguístiku", esplikasaun hosi Benvinda Lemos Oliveira, dosente hosi departamentu iha UNTL no kordenadora no koautora hosi disionáriu, ba ajénsia Lusa.

Oan-feto hosi aman kabu-verdianu no inan timoroan, moris iha Timor-Leste - fatin ne'ebé nia kompleta mestradu - Benvinda Oliveira esplika katak disionáriu ne'e hakarak hatán ba falta ne'ebé hetan iha área ne'e no buka hametin padraun lian tetun nian, lian ida ne'ebé sei iha evolusaun maka'as.

"Ami loron-loron haree susar ne'ebé ami nia estudante sira hetan. Dalabarak iha koñesimentu balun iha lian portugés, hatene nia valór semántiku maibé la konsege halo ligasaun ba situasaun adekuadu ida", nia esplika.

Nia objetivu maka bele halo edisaun ida ho presu ne'ebé alunu timoroan sira bele sosa maibé folin asosiadu sira ba projetu la permiti ida.

Edisaun dahuluk, hosi Lidel, ho kópia 2.600 resin haruka ba Timor-Leste, sei iha daudaun revizaun nune'e, tuir dosente, bainhira hakotu tiha prosesu ne'e maka sei bele hahú edisaun seluk, ho versaun Tetun-Portugés nian.

Nia hatete katak serbisu ida ne'e hanesan "importante tebes hodi hametin lian ofisiál rua Timor-Leste nian", no iha kazu tetun nian sei iha buat barak atu halo hodi garanti dezenvolvimentu di'ak hosi lian ne'e.

"Seidauk iha serbisu barak kona-bá lian tetun. Tanba ne'e ha'u hanoin katak obra ne'e sei di'ak la'ós de'it ba estudante sira maibé mós ba ema sira ne'ebé hadomi lian", nia hatete.

Agora daudaun, Departamentu Portugés hosi UNTL iha dosente timoroan hamutuk na'in 11 ne'ebé hetan apoiu hosi profesór portugés sira, tinan-tinan iha alunu atus ida resin.

Benvinda Lemos Oliveira konsidera ona katak hanesan importante habelar serbisu ne'ebé halo daudaun iha nasaun hodi hametin lian ofisiál rua, portugés ho tetun, investe nune'e iha formasaun no mós iha nia divulgasaun.

"Hanesan oituan tebes. Programa sira iha televizaun ladún iha interese iha lian portugés no tetun hodi hetan interese hosi joven sira. No tanba ne'e antena parabóliku iha liu interese ba nasaun viziñu", nia hato'o ezemplu ida.

SAPO TL ho Lusa