BISPO DOM VIRGILIO : PASKOA ATU HAFOUN MORIS NO HAMETIN FIAR

Bispo Diocese Dili, Dom Virgilio do Carmo da Silva hatete selebrasaun paskoa ne’e la’os atu hanoin deit ba Jesus nia mate maibe paskoa ne’e atu hafoun sarani ida idak ninia moris no hametin nia fiar.

Bispo Diocese Dili hato’o lia hirak ne’e iha ninia homilia iha misa Domingo resureisaun nebe hala’o iha Parokia Santo Antonio Motael.

“Selebrasaun paskua ne’e, la’os atu hanoin de’it ba Jesus nia mate, maibé paskua ne’e atu hafoun sarani sira nia fiar, no sarani ida-ida mós tenke hanoin ida-ida nia fiar” homilia Dom Virgilio do Carmo.

Selebrasaun misa Domingo resuresaun iha Igreja Maotel diriji direitamente husi Bispo Diocese Dili nebe partisipa mos Presidente Republika, Taur Matan Ruak, primeira Dama, Isabel Ferreira hamutuk sarania Parokia Santo Antonio Motael.

Durante semana santa, iha Kinta feira santa, Bispo Diocese Dili fase apostlu sira nia ain iha Igreja Katedral.

Bispo ninia homilia iha Kinta feira Santa katak Moromak tanba domin haruka nia oan mane mesak Jesus Kristu mai iha mundo atu salva ema hotu liu husi hatudu hahalok rua ne’ebe konkretu hodi fase apostolu sira nia ain no harii eukaristia.

“Jesus fase apostolu sira nia ain pedro rasik la kompriende buat ne’ebe Jesus halo ba nia nia rezeita jesus ida maromak nia mak halo ida ne’e hafoin nia husu ba apostolu sira imi hatene buat ne’ebe ha’u halo ba imi, imi bolu ha’u mestri no los duni ida ne’e mak ha’u se, ha’u mak mestre no nai fase imi nia ain no imi mos tenke fase ema seluk nia ain, ha’u husik hela ezemplu ida atu nune’e imi mos bele tuir fase ain katak sa pronto atu servi nune’e mos mai ita la’os ita tenke mos fase maluk sira nia ain loron- loron, ida ne’e nia indikasan mak saida lolos katak ita hotu presiza tulun malu iha ita nia familia, iha ita nia servisu fatin no maluk sira iha fatin hotu- hotu” homilia Amo Bispo Virgilio do Carmo iha misa Kinta feira santa (24/3/16) ba sarani sira iha igreja Katedral Dili.

Amo Bispo mos hatutan, dala ruma ema ida-idak diferenti opiniaun maibe labele sai fali hanesan obstakulu ba aktu de karidade tulun malu ida ne’e mak buat ne’ebe Jesus hakarak hanorin ba ema hotu.

“Ha’u hanoin ida ne’e importante   ita presiza haburas iha ita nia sosiedade katak ita presiza loke ita nia fuan ho laran atu hatene no haree ema seluk ninia nesesidade,”esplika Amo Bispo Virgilio.

Amo Bispo Virgilio hakleken mos katak, ohin loron mosu atitude ida ne’ebe hanaran indeferentismo ne’ebe maka’as tebes iha sosiedade, atitude ida ne’ebe ema dehan katak la manas no lamalirin bai-bain deit. indeferentismo signifika ida ne’ebe hola pozisaun ida konaba kazu ka situasaun konkretu ida.

“Wainhira ita haree ita nia maluk iha susar nia laran maibe ita nia fuan la bok aan ne’e tanba karik ita ema nia fiar ba maromak hahú mihis dadaun ona ka ita nia fiar lakon dadaun ona ka tanba tendensia buka atu kontente deit ho sasan mundo ninian ka tanba ambisaun makas ka susar atu simu dotrina igreza ninian iha area sira hanesan moral no soaial nian, tanba gradualmente ema hanoin deit nia an tanba ita nia orgulhu ,egoismu ne’ebe halo ita buka uluk mak ita nia interese pesoal molok ema seluk ninian,”dehan Amo Bispu Virgilio.

Ami Bispu Virgilio hatutan, Amo Papa Francisco afirma katak, indeferentismu ne’e laos deit buat ida ne’ebe iha Europa ka iha ASEAN ka iha mundo tomak maibe ida ne’e Jesus konvida ema hotu atu sai ema ne’ebe apaisonado laos ema ne’ebe la manas la malirin.

Nune’e mos Amo Parokia Maria Auxiliadora Dom Bosco, Elias Maia iha nia homelia ba Sabado Aleluia hateten, iha kalan Sabado Aleluia hanesan loron ida ne’ebe jesus moris fali atu lori ema tomak ba moris foun.

“ husi jesus nia terus no nia mate mak nia hahoris sakramentu sira ne’ebe ohin lori fali ita ba salvasaun foun nian, husi ran, bee ne’ebe sulin husi nia sorin iha igreza fo sakramentu sira ne’ebe ha’u bele renova ita nia identidade foun haksolok ho maromak,”haklaken Amu Parokia Elias Maia. Cos/car

Jornal Nacional