Governadór-jerál
australianu, Peter Cosgrove, felisita iha loron-kinta ne'e veteranu timoroan
sira nia knaar iha luta hasoru okupasaun Indonézia no fó hanoin
"priviléjiu" hodi lidera, hafoin referendu hosi autodeterminasaun,
forsa multinasionál ne'ebé haruka ba Timor-Leste.
"Ha'u
hanoin imi no buat hotu ne'ebé ha'u hatene kona-bá imi maka nasaun modernu
Timor-Leste iha imi nia neon sira, kona-bá imi nia korajen ba luta durante
tinan hirak ne'e. Ha'u laiha dúvida katak vitória ne'e hanesan imi nian",
Cosgrove hatete.
Peter
Cosgrove ko'alia iha Díli ba ema atus resin iha Konferénsia Nasionál dahuluk
Veteranu sira nian no Kombatente sira Libertasaun Nasional nian, ne'ebé halibur
iha loron tolu ikus ne'e frente tolu hosi rezisténsia timoroan hasoru okupasaun
indonéziu: frente armada, klandestina no diplomátiku.
"Ha'u
koñese imi nia luta naruk, ha'u koñese imi bainhira ha'u to'o iha tinan 1999 ho
tropa millaun resin hosi nasaun oioin. Ami iha priviléjiu no oportunidade hodi
marka prezensa iha-ne'e bainhira imi hahú independénsia", nia hatete.
"Tanba
ne'e maka hanesan onra boot ida hetan konviti hosi imi nia Prezidente ba loron
ne'e. Ha'u hanesan mós veteranu ida no ha'u iha imi nia sorin hodi fó onra ba
imi nia serbisu ne'ebé fó ba nasaun", nia afirma.
Cosgrove
fó hanoin katak "ligasaun metin entre veteranu sira hosi nasaun rua ne'e
mosu kleur ona", ho timoroan sira ajuda soldadu australianu sira nian iha
nasaun durante funu mundiál daruak".
"Ba
veteranu australianu barak, tanba imi maka ema barak ohin loron moris. Tanba
ne'e, iha domin boot no apresiasaun ba nasaun ne'e no ba nia povu", nia
hatete.
Cosgrove
refere mós ba "sakrifísiu no terus ne'ebé timoroan sira hetan entre 1975
no 1999".
"Imi
nia determinasaun, korajen no forsa durante períudu sira ne'e sei hanoin
durante tempu barak", nia afirma ona.
"Esperiénsia
ne'ebé ita iha hanesan soldadu hela nafatin ho ita. Funu ida hotu, deklara ona
dame maibé ita nia pasadu sai hanesan parte hosi ita. Nasaun sira iha
obrigasaun sira hodi fó onra ba sakrifísiu sira hosi imi nia veteranu sira no
hosi nia família sira", nia hatutan.
Hodi
taka konferénsia, Prezidente Repúblika Timor-Leste nian, Taur Matan Ruak,
refere ona importánsia hosi enkontru hosi veteranu sira no haruka mensajen
espesiál ida ba veteranu australianu sira, hodi fó hanoin lasu sira entre
nasaun rua ne'e.
"Ita
presiza kontributu hosi veteranu sira ba dezenvolvimentu nasaun nian. Reuniaun
ne'e hanesan importante tebes hodi debate imi nia kestaun sira, asuntu sira
relasionadu ho futuru nasaun nian", nia hatete.
"Rezultadu
sira bele iha impaktu prátiku no pozitivu ida iha situasaun hosi veteranu sira.
Tenki kontribui hodi promove solusaun foun sira", nia afirma ona.
Xefe
Estadu hatete katak hanesan importnate iha "unidade ida hosi
objetivu" mantén prinsípiu sira ne'ebé lori sira ba luta ba independénsia
nasaun nian, hodi buka defende nafatin interese nasionál sira.
Taur
Matan Ruak destaka ona maturidade no determinasaun hosi veteranu sira no nia
knaar hodi buka dame no estabilidade.
Prezidente
defende mós medida sira hodi favorese integrasaun sosial hosi veteranu sira,
maibé mós atu garanti ba sira apoiu "sustentável" ida, hodi tulun
promove nia kapasidade hodi kontribui ba dezenvolvimentu ekonomia nasaun nian.
"Ha'u
apelu ba espíritu nasionalizmu hosi veteranu sira. Nasaun presiza imi. Presiza
imi nia kontributu. Uza imi nia esperiénsia no kapasidade hodi serbi povu no
nasaun", nia hatete.
Enkontru
iha Díli, ne'ebé partisipa mós organizasaun populár sira, hosi feto sira no
hosi juventude, hetan mós prezensa hosi partisipante sira Timor-Leste nian, no
mós hosi Austrália, Makau, Reinu Unidu, Mosambike no Portugal.
Iha
serimónia enseramentu nian partisipa mós líder istóriku balun hosi Timor-Leste
no hosi polítiku australianu sira ne'ebá apoiu liu ba luta independénsia
timoroan nian, eis-senadór Gordon McIntosh, ne'ebé tinan ne'e sei halo tinan
91.
SAPO
TL ho Lusa – Foto: Presidência da República de Timor-Leste
Sem comentários:
Enviar um comentário