VIZITA PR TAUR BA JAPAUN, SEI ASINA AKORDU RUA HO VALOR MILLAUN US$ 22

Prezidenti Repúblika (PR) Taur Matan Ruak, Sábadu (13/3) hala’o vizita traballu ba Japaun, hafoin Parlamentu Nasionál (PN) aprovasaun viajen Prezidenti Repúblika (PR) foin lalais ne’e ho votus a favor 12, abstensaun 36 kontra 0.

Iha Xefi Estadu Taur Matan Ruak nia vizita ba Japaun ne’e, sei atende asuntu importante ida mak asina akordu rua ho Estadu Japaun nian ne’ebé atu fó apoiu osan mai Timor Leste (TL) ho valor millaun US$ 22. No asuntu seluk mak konaba asina akordu konaba konstrusaun ne’ebé mak Japaun fó hanesan grand ba TL, espesifiku liu ba konstrusaun ba Fakuldade Enjeneria Universidade Nasionál Timor Lorosa’e (UNTL).

Ministru Negosius Estranjeirus i Kooperasaun (MNEK), Hernani Coelho informa katak, vizita Taur Matan Ruak nian ba Japaun ne’e, iha mós posibilidade atu ko’alia kona-ba asuntu balun ne’ebé relasiona ho seguransa iha tasi ninian, nomós kooperasaun ekonómika entre TL ho Japaun.

“Iha biban ida ne’e mós, Japaun ho Timor Leste sei asina mós troka de notas ba konstrusaun ne’ebé mak Japaun fó hanesan grand ba Timor Leste, atu halo konstrusaun ba ita nia fakuldade de enjeneria Universidade Nasionál ninian, nomós segundu dokumentus ne’ebé sei asina iha Japaun mós, kona-ba akizasaun ekipamentus ba Portu Dili ho Portu Oe-cusse. Akordu rua ne’ebé mak Timor Leste ho Japaun sei asina ne’e, nia valor osan US$ milaun 22, ne’ebé mak Japaun sei fó mai Timor Leste iha biban ida ne’e,” informa Ministru Negósius Estranjeirus no Kooperasaun, Hernani Coelho ba Jornalista sira iha Aeroportu Internasionál Prezidenti Nicolau Lobato Comoro Dili, Sábadu (12/03).

Hernani Coelho dehan, Japaun iha sira nia Emperador, depois mak tu’un mai Primeiru Ministru, entaun Prezidenti Repúblika sei hasoru malu ho emperador Japaun ninian hanesan mós Xefi Estadu.

“Ne’e vizita Estadu Prezidenti Repúblika nian ba Japaun, vizita ne’e ita planu desde 2014, maibé tanba iha difikuldades ba ajustamentu ajenda, entre Prezidenti Repúblika nian ho Kaza Empereal Japaun ninian, ne’eduni foin mak ita realiza iha fulan ida ne’e,” relata Hernani Coelho.

Hernani esklarese, Taur Matan Ruak mós sei hasoru malu ho Primeiru Ministru Japaun iha loron 15/03.

Hernani informa, iha Japaun, Prezidenti Repúblika Taur Matan Ruak mós sei halo vizita ba universidade balun iha Japaun, no sentru formasaun militar Japaun ninian, ne’ebé mak oras ne’e membru F-FDTL balun hala’o hela formasaun iha ne’ebá.

Iha vizita ne’e mós, Prezidenti Repúblika sei ba vizita kompañia sira ne’ebé mak oras ne’e dada’uk fó apoiu hela ba Timor Leste iha área komersiál, diresaun kafé ninian, nomós empreza sira ne’ebé mak posivelmente atu mai TL.

“Tanba ita nia sistema ne’e lahanesan, Prezidenti ne’e Xefi Estadu los de’it, Governu, ida ne’ebé mak atu hala’o servisu ne’e, iha Primeiru Ministru nia liman. Ne’eduni mak, Prezidenti nia fokus ne’e sei ba liu Emperador, tanba iha Japaun mós, Emperador ne’e, nia laiha funsaun ezekutivu nian, maibé Primeiru Ministru Japaun husu mós atu hasoru malu ho ita nia Prezidenti iha biban ne’ebé mak Prezidenti sei iha Japaun,” informa Hernani Coelho.

Nia haktuir, konserteza iha sorumutu ho Primeiru Ministru Japaun ninian ne’e, sei ko’alia kona-ba asuntu jeral kooperasaun entre rai rua ne’e nian, no sei ko’alia mós kona-ba asuntu sira ne’ebé mak relasiona ho kepentingan rejionál, li-liu iha evolusaun ne’ebé mak oras ne’e akontese.

Membru Governu la marka prezensa

Iha vizita Prezidenti Repúblika, Taur Matan Ruak nian ba Japaun ne’e, laiha membru Governu ida mak marka prezensa iha aeroportu Internasionál Nicolau Lobato, hodi akompaña Xefi Estadu ne’e molok sa’e aviaun.

Membru Governu na’in rua ne’ebé mak marka prezensa iha Aeroportu Internasionál Nicolau Lobato mak, Ministru Negosius Estranjeirus i Kooperasaun, Hernani Coelho, ho Vise Ministru Negosius Estranjeirus i Kooperasaun, Roberto Soares, tanba nia atu akompaiña Prezidenti Repúblika nia vizita ba Japaun.

Tuir observasaun Jornalista JN-Diário durante ne’e nota katak, desde uluk kedas bainhira eis Primeiru Ministru Kay Rala Xanana Gusmão atu halo vizita ba rai liur, membru Governu sira no membru Parlamentu Nasionál hot-hotu sempre hatudu oin iha Aeroportu Internasionál Nicolau Lobato hodi haree Xanana molok sa’e aviaun.

Maibé ikus-ikus ne’e la’os Prezidenti Repúblika de’it, maibé bainhira Primeiru Ministru Rui Maria de Araújo atu halo vizita ba rai liur, membru Governu ida rua de’it mak hatudu oin iha Aeroportu Internasionál Nicolau Lobato.

Antes Prezidente Repúblika Taur Matan Ruak atu sa’e aviaun, Xefi Estadu ne’e sei halo uluk pasa revista ba parade forsa F-FDTL sira ne’ebé mak forma ona iha aeroportu.

Prezidenti Repúblika Taur Matan Ruak sai husi Timor Leste iha tuku 15:25, ho aviaun Silk Air.

Vizita Xefi Estadu nian ba Japaun, hetan akompaiña husi Primeira-Dama, Isabel da Costa Ferreira, Vise Ministru Negosiu Estranjeiru no Kooperasaun, Roberto Soares, Embaixador Timor-Leste nian ba Japaun, Filomeno Aleixo da Cruz, Diretur Jeral Asuntu Relasoens Bilateral MNEK nian, Isilio Coelho, Diretur ba Asuntu Azia Sentral, Sul no Leste MNEK nian, Nuno Alves no ofisial sira seluk.

Tuir ajenda, Taur Matan Ruak, sei fila hikas mai Timor Leste (TL) iha loron 22 fulan Marsu 2016.cos

Jornal Nacional