TAUR-HORTA HUSU GOVERNU, KONTROLA KORUPSAUN NO KUIDADU OSAN FUNDU PETROLEUM

Prezidenti Repúblika (PR), Taur Matan Ruak ho eis Prezidenti Repúblika, José Ramos Horta bolu atensaun ba Governu atu kontrola didi’ak korupsaun iha Timor Leste (TL), no uza osan fundu petroleum ho kuidadu, tanba agora dada’uk folin mina iha merkadu internasionál tuun maka’as.

Eis Prezidenti Repúblika, José Ramos Horta informa katak, Governu tenki kontrola gastus ne’ebé Governu halo.

“Ami ko’alia mós kona-ba situasaun iha rai laran, preokupasaun nafatin husi Prezidenti Repúblika, Governu bele kontrola di’ak liu korupsaun, bele kontrola gasta osan arbiru, tanba ita nia folin mina mós tuun, osan husi fundu soberanu sai dadaun, osan tama menus,” dehan Ramos Horta ba jornalista sira iha Palácio Prezidensia Aitarak Laran Dili, Kinta (23/06).

Lauriadu Nobel da Paz ne’e hatutan katak, Governu liu husi Primeiru Ministru, Rui Araújo halo esforsu maka’as, maibé nia mós iha difikuldades atu hadia Governasaun.

Alénde ne’e, José Ramos Horta mós dehan, nia ko’alia ho PR Taur Matan Ruak, tanba eis Prezidenti Repúblika ne’e atu ba tuir konferensia bo’ot ida iha Austria Vienna.

Nia afirma, konferensia bo’ot ne’e, sei partisipa husi nasaun 40, husi Europa ho Europa Leste.

Ramos Horta dehan, konferensia ne’e naran, annual security review conference, hodi ko’alia kona-ba seguransa no páz.

Horta haktuir, nia diskursu prinsipal iha Vienna mak, kona-ba páz no seguransa iha mundu, i papél nasoens unidas nian, oinsa mak ONU bele hadi’a nia profesionalismu no nia papél, nomós ko’alia kona-ba dezafiu seguransa iha Europa, tanba oras ne’e dada’uk refuziadu rihun atus ba atus mak tama iha Alemanha, France, Grace no Italia.

Eis Prezidenti Repúblika ne’e esklarese, ida ne’e halo presaun maka’as ba sosial, polítiku, seguransa ba sira hotu, i problema ekonómiku iha Europa mós, to’o agora laiha solusaun, hodi halo rai hotu iha Europa hetan difikuldades oi-oin.

“Ha’u nu’udar enviadu espesial iha ne’eba, kona-ba seguransa, páz mundial, nomós husi ne’eba ha’u liu ba Portugal, enkontru ho Prezidenti Repúblika Portugal ho Primeiru Ministru,” katak Horta.

Tanba ne’e, José Ramos Horta dehan, nia ba husu PR Taur, karik iha mensajen ruma ba Prezidenti Repúblika Portugal.

“Prezidenti Repúblika,  Taur Matan Ruak husu ba ha’u para lori tan mensajen ida ba Prezidenti Repúblika Portugal, bainhira mak nia bele vizita Timor,” informa Horta.cos

Jornal Nacional