Membru F-FDTL Nain 10 Aprende Orden Unida Iha Cina, Lere: Ne’e Importante

Membru Falintil-Forsa Defeza Timor-Leste (F-FDTL) nain 10 mak tuir ona treinamentu kona ba orden unida nian iha Cina, e tuir Xefe Estadu Major Jeneral Lere Anan Timor, ida ne’e importante tebes tanba TL seidauk iha ninian rasik.

Tuir nia, importante ba aprende iha ema nia rain, atu oinsa mak halo formatura ne’ebe mak rapido no diak.

“Ba aprende hodi hare ema nian ne’e oinsa, ida ne’ebe mak apar ho ita nia situasaun no kulturais, entaun ita aplika,” Major Lere hateten, iha Dili.

Alende iha Cina antes ne’e, nia dehan instituisaun F-FDTL delega ona membru lubuk ida hodi ba tuir treinamentu orden unida iha Malaysia inklui Amerika hodi sai hanesan referensia.

Tanba tuir nia, F-FDTL to’o agora seidauk dignifika nia aan rasik kona ba dutrina orden unida saida mak presiza atu adopta.

“To’o agora ita seidauk dignifika ita nian rasik, ita seidauk hatene ida ne’ebe mak ita nian lolos, sai ita nia dutrina,” nia hateten.

Tuir lolos nia hateten, presiza iha ona statute no lei ida hodi hatuur klarumente kona ba forsa nian orden unida, atu nune’e labele troka ba mai.

“Ita tenke iha marsa ida ne’ebe serteza, katak ita nian mak ne’e ona, lideransa forsa bele troka malu, maibe marsa ne’e la muda ona,” nia hateten.

Enkuantu membru nain 10 ne’e ba tuir formasaun orden unida iha Cina durante fulan rua (Maiu –Junu 2016), kompostu husi Unidade Komponente Apoiu Servisu (CAS) nain rua, Unidade Polisia Maritima nain ida, Quartel Jeral nain ida, Naval nain rua, Komponente Terestre nain rua no husi Sentru Formasaun Terenu nain rua.

Iha parte seluk Membru Parlamentu Jacinto Viegas Vicente, hateten formasaun hotu-hotu importante ba sira, kapasita sira nia aan hodi eleva instituisaun ne’e ba oin ho diak liu tan.

Maibe, nia dehan instituisaun ne’e rasik mak tenke maneja membru sira ne’e, hafoin ba tuir formasaun e wainhira fila mai, tenke monta duni sira iha area ne’ebe sira foti ne’e.

“Tenke koloka ema ne’e tuir sira nia kapasidade, pur ezemplu sira ba tuir formasaun marxa nian, entaun ema ne’e tenke ida ne’e nian duni,” nia sujere.

Atu nune’e, nia hateten kada membru ida bele profesioanal duni iha nia area rasik, iha nasaun ne’ebe deit akontese hanesan ne’e.

The Dili Weekly