KONSULTA POPULAR 30 AGOSTU 1999-2016 NO LORON INTERNASIONÁL BA EMA LAKON FORSADA

Aliansi Nasionál Timor-Leste ba Tribunál Internasionál

KOMEMORA LORON KONSULTA POPULAR 30 AGOSTU 1999-2016 NO LORON INTERNASIONÁL BA EMA LAKON FORSADA

Komunikadu da Imprensa

“Hanoin hikas pasadu hodi kontinua luta kontra impunidade iha Timor Leste no Mundu”

Povu Timor-Leste komemora tan loron 30 Agostu nu’udar loron konsulta popular ba dala XVII (1999-2016). Loron istóriku ne’e rezulta ukun rasik an ne’ebé nakonu ho sofrementu ne’ebé mosu durante krime grave naruk ne’ebé komete husi militár Indonézia sistimatikamente. Hafoin hetan ukun rasik an povu Timor-Leste moris iha estadu direitu no demokrátiku. Infelizmente depois de tama iha prosesu ukun an nian laran, Estadu Timor-Leste hahu ho dezenvolvimentu ne’ebé foka liuba dezenvolvimentu fiziku no seidauk iha justisa kredivel ba krime grave ne’ebé prepetrator sira komete hasoru povo Timorense. Ukun na’in sira iha Timor-Leste too ohin loron seidauk nunka iha vontade di’ak ba asuntu justisa ba krime grave pasadu nian ne’ebé nudár aliserse ba estadu direitu demokrátiku nian.

Aléinde ne’e, iha loron 30 Agostu komemora mós hanesan loron Internasionál ba ema lakon forsada, familia sira ne’ebé lakon no família sira nafatin sei moris iha miseravel nia laran. Familia barak kontinua halerik no ezije ba sira nia ema ne’ebé lakon durante periodu konflitu nia laran. Sobrevivente, ativista direitus umanus no umanidade internasionál kontinua hein no ezije akutabilidade husi kriminozu sira no justisa ba sira hotu ne’ebé buka inklui vítima no família vítima sira.

Too ohin loron, liu tiha dékada ida, impunidade nafatin eziste no nia konsekuénsia hatudu momoos hela. Realmente hatudu katak Governu Indonézia proteje kriminozu sira husi akontabilidae krime ne’ebé sira komete iha Timor-Leste. Aat liután mak governu Indonézia fó oportunidade no fó fatin ba autór krime grave hodi asume pozisaun importante, ne’e hatudu katak Estadu Indonézia haburas impunidade no fó fatin atu krime sira ne’ebé akontese iha pasadu kontinua repete.

Liu husi eventu importante rua ne’e, ANTI hakarak apela no ezije atu:

1. Governu rua (Timor-Leste no Indonézia) ho sosiedade hodi hahú estabelese Komisaun  ba Ema Lakon hodi trata asuntu ema lakon forsadamente durante okupasaun ilegál Indonézia nian, nune’e bele reintegra fali ema sira ne’ebé militár Indonézia halakon forsadamente ba sira ninia família;

2. Ezije ba Nasoins Unidas atu hahú tau agenda no diskute relatóriu Komisaun Inkéritu Nasoins Unidas nia no KPP-HAM Indonézia nian, espesialmente rekomendasaun Tribunal internasionál ba kazu krime grave iha Timor-Leste. Tanba laiha mekanizmu doméstiku ida inklui iha Timor-Leste no iha Indonézia mak fornese no garantia justisa ne’ebé justu ba povu Timor-Leste, umanidade internasionál liu-liu ba família vítima sira.

3. Ba Konsellu Seguransa ONU, atu mantein no konsisten ba desizaun kontra impunidade bazeia ba akuzasaun husi Painel Espesial ba Krime Grave iha tinan 2003 no buka mekanismu efetivu hodi asegura akuntabilidade ne’ebé kredivel husi autór kriminozu sira partikularmente akuzadu eis Jeneral Wiranto;

4. Husu ba estadu Timor-Leste atu asina no retifika konvensaun Internasionál kona-ba protesaun ba ema hotu husi halakon forsadamente nune’e bele hahú prosesa kazu ema lakon forsada no labele repete fali asuntu ne’e iha futuru;

5. Husu ba Governu Indonézia atu respeita prinsipiu direitus umanus atu la-bele taka dalan ba justisa ba kazu krime grave liu-liu prosesa ema lakon forsadamente iha Timor-Leste nune’e hahú hametin relasaun bilateral entre estadu Timor-Leste no Indonézia ba oin ne’ebé bazeia valores direitu umanus universal; sira.

6. Husu ba PDHJ no Komnas-HAM Indonézia atu servisu sériu ba akordu ne’ebé organizasaun rua ne’e estabelese liu-liu kona-ba ba ema lakon nune’e bele buka tuir ema sira ne’ebé lakon durante okupasaun militár Indonézia nian.

7. Husu ba Governu Timor-Leste, liu-liu Ministériu defeza no seguransa atu uza rekomendasaun sira husi Chega hanesan referénsia ba planu empenamentu forsa seguransa rua, nune’e la repete tan krime sira ne’ebé komete husi Militár Indonézia durante okupasaun.

Dili, 30 Agostu 2016

Sisto dos Santos - Koordenadór Board ANTI

Aliansi Nasionál Timor-Leste ba Tribunál Internasionál

(THE TIMOR LESTE NATIONAL ALLIANCE FOR AN INTERNATIONAL TRIBUNAL)

Sekretariadu; Asosiasaun Hak, kontaktu; lanarradel@gmail.com, moniz@jsmp.minihub.org, atino@laohamutuk.org, +67077179655, +67077402231, +67077432621