SUCO TAPO/MEMO SEIDAUK SENTE DEZENVOLVIMENTU

Díli, Tinan 14 ona, Suku Tapo/Memo iha Postu Administrativu Maliana, Munisípiu Bobonaro seidauk sente dezenvolvimentu, tanba seidauk iha estrada diak, ponte, be’e moos, eletrisidade no Sentru Saúde mos laiha.

Tinan 14 ona, Suku Tapo/Memo iha Postu Administrativu Maliana, Munisipiu Bobonaro seidauk sente dezenvolvimentu, tanba seidauk iha estrada diak, ponte, bee moos, eletrisidade no Sentru Saúde, irigasaun Maliana 2 no seluk-seluk tan iha Suku Tapo/Memo limitadu tebes,” portavóz Moisés Vicente informa liu husi Konferensia da Imprensa iha salaun Yayasan HAK, Farol, Kuarta 24/8/2016).

Nia hatutan, bazeia Klibur Estudante no Joventude Tapo/Memo-Oan (KLEJOTAMO), nia monitorizasaun katak dezenvolvimentu iha suku refere seidauk hetan rezultadu ne’ebé diak. “Tanba estrada husi Postu Administrativu Maliana ba suku Tapo/Memo iha kondisaun ne’ebé seidauk diak, ponte ida iha Nakarena aldeia Huluatin iha Suku Tapo/Memo ne’ebé mak halo iha tempu okupasaun Indonesia nian komesa aat dadaun ona, ne’ebé bainhira udan sei difikulta boot ba komunidade iha area refere,” nia esplika.

Nia dehan, iha tinan 2011, Secretariu Estadu Eletrisidade atual Primeiru Vice Ministru Obras Publika Transporte no Komunikasaun (MOPTK), Januario Pereira halo monitorizasaun hahu husi Hospital Tuan Maliana ba Aldeia Lepguan, Pipgalag II, to’o Suco Saburai, ba to’o Suco Zildapil Postu Administrativu Lolotoe nian maibé to’o agora projetu refere seidauk realiza. “Tanba ne’e KLEJOTAMO sira hakarak rekomenda ba ministeriu relevante hodi foti medida lalais ba suku refere,” nia rekomenda.

Antes ne’e iha fatin seluk, komunidade iha Suku Leber durante ne’e tinan 14 ona mos seidauk sente dezenvolvimentu tanba la asesu ba eletrisidade no estrada. “Tinan-tinan Parlamentu Nacional aprova osan ne’ebé boot maibé ami sente kona-ba ezekusaun orsamentu sira ne’e,” Xefe Suku Leber, Joanico da Silva hato’o liu husi aprezentasaun relatoriu suku nian, ba Prezidente Republika (PR), Taur Matan Ruak liu husi dialogu komunitaria iha Suku Leber, Munisipiu Bobonaro, kinta (18/8/2016).

Xefe suku hatutan, komunidade suku Leber maioria mak sei hela iha uma duut no oituan mak hela ona uma kalen, maibe eletrisidade laiha. Maske nune’e Xefe Suku hatete iha Aldeia balun mak asesu ona ba eletrisidade, maibe balun seidauk asesu ba eletrisidade.

Kona-ba Estrada, Xefe Suku hatete, tempu udan, estrada ba suku refere laiha tanba tahu mak nakonu, tempu bailoron mak foin haree hetan estrada. “Liña eletrisidade seidauk, nia rin seidauk tama mai iha ne’e. Tempu bailoron ami hatene roda fatin maibe tempu udan ami defisil haree roda fatin,” nia esplika. Tuir nia, kondisaun estrada afeta komunidade lori produtu lokal ba merkadu. Tanba ne’e nia rekomenda ba Xefe Estadu hodi hatoo preukupasaun sira ne’e ba Governu liu-liu ministeriu kompetente hodi tau matan ba problema ne’ebe mak komunidade sira infrenta.

Hatan ba preukapasaun ne’e Xefe Estadu hatete, prioridade numeru ida mak eletrisidade, tanbe ne’e dadauk ne’e komunidade 85% mak asesu ona ba eletrisidade. Tuir Xefe Estadu, komunidade ne’ebe mak seidauk asesu ba eletrisidade hela deit ona 15% tanba ne’e eletrisidade sei to’o maibe presiza pasiensia. Xefe Estadu dehan, Estrada mos dadauk ne’e Governu halo esforsu maka’as, foka liu ba Estrada nasional sira ne’ebe liga kapital Dili ba munisipiu sira iha teritoriu Timor laran tomak. “Governu sei halo maibe lori tempu, agora mak la halo maibe iha futuru sei halo dada eletrisidade, hadia Estrada,” Esplika Xefe Estadu.

Maske nune’e, Xefe Estadu dehan, SEPFOPE mak tau matan ba Estrada rural sira, maibé SEPFOPE mos iha orsamentu oituan deit, tanba ne’e presiza pasiensia tanba Estrada sei halo. Xefe Estadu, esplika Governu nia obrigasaun mak halo Estrada, dada eletrisidade, hadia kondisaun saude no hadia kondisaun eskola.

Maibé ba komunidade, Xefe Estadu dehan, servisu mak hadia ekonomia uma laran, haruka oan sira ba eskola, kuidadu saude no servisu hamutuk. (mj4)

Foto: Ponte ida Nakarena Suco Tapo/Memo besik at dadaun ona. Foto KLEJOTAMO Abrão Gomes 

Timor Post, loron Kinta-feira, 25 Agostu 2016