Governu no Parseiru Dezenvolvimentu Diskuti PENE

DILI (ANTIL) - Governu liu-hosi Sekretaria Estadu Polítika Formasaun Profisionál no Empregu (SEPFOPE) deskuti Planu Estratéjiku Nasionál Empregu (PENE) iha edifísiu Trade Invest, Kolmera, Kuarta (17/8).

“Ita hotu hatene katak dezempregu iha rai laran ne’e sei boot teb-tebes, tamba ne’e, ita buka oinsá maka elabora planu estratéjiku ida nu’udar giaun atu hamenus dezempregu iha rai laran,” Diretór Jerál SEPFOPE, Jacinto Barros Gusmão ba ANTIL iha fatin reuniaun.

Atu hamenus dezempregu iha rai laran, nia esplika, iha pontu importante tolu; ida maka apoia setór privadu hodi loke kampu serbisu barak ba juventude. Daruak, oinsá maka investór públiku ou projetu governu nian bele oferese kampu serbisu ba joven sira. Datoluk, buka maneira oinsá koopera ho nasaun amigu (bilaterál) hodi haruka trabalhadór sira ba iha rai liur.

“Ida ne’e atu haree fali koordenasaun liña ministerial atu projetu governu nian hotu bainhira ema ruma manán karik tenki kria serbisu ba timoroan sira nune’e bele hamenus dezempregu no mós doadór sira iha TL hanesan ILO no UNDP tenki koordena ho SEPFOPE hodi uza trabalhadór timoroan sira ne´ebé maka iha kualidade,” Barros haktuir.

Nia hateten reuniaun ida ne’e foin preliminár no sei hala’o semináriu nasionál nebe sei konvida espesialista hosi rai liur no timoroan rasik hodi fahe sira nia matenek. (Jornalista: Xisto Freitas)

Foto: Sorumutu entre governu no parseiru dezenvolvimentu kona-ba Planu Estratéjiku Nasionál Empregu iha edifísiu Trade Invest, Kolmera, Kuarta (17/8).