Atake iha ospitál iha Iémen provoka na’in neen mate, hatete rebelde sira

Atake aéreu hosi koligasaun árabe aliada podér atinje ohin ospitál ida iha ne’ebé iha Médicos Sem Fronteiras (MSF), iha Iémen, provoka ema na’in neen mate, oras 48 hafoin atake sira seluk ne’ebé hamate labarik na’in 10.

Atake iha sábadu no ohin nian ne’ebé akontese iha norte nasaun nian no foti zona ne’ebé sira ne’ebé rebelde 'huthis' kontrola sai hanesan alvu, tenta hadook prezidente Abd Rabbo Mansour Hadi hosi podér horikedas 2014.

Organizasaun umanitária MSF, iha ekipa ida ne’ebé halo servisu horikedas 2015 iha ospitál públiku sidade Abs, iha norte nasaun nian, anunsia iha rede sosiál Twitter katak "ospitál sai alvu ba atake" iha inísiu loraik.

"Seidauk hatene kona-ba númeru ema mate no kanek sira", hatutan organizasaun.

Maibé, Ayman Mazkour, responsável departamentu saúde nian iha provínsia Hajja, afirma katak ema na’in neen mate no 20 hetan kanek.

Abitante Abs sira mós konfirma atake ba ospitál ne’e, no hatutan katak iha loron hirak ikus ne’e koligasaun ataka beibeik pozisaun rebelde iha rejiaun.

Amnistia Internasionál kondena ona akontesimentu ne’e. "Ataka instalasaun médika ho intensaun ne’e viola maka’as  direitu umanitáriu ne’ebé konstitui krime funu", nia aviza no husu inkéritu ida.

Funu iha Iémen iha 2015 hamate ona ema 6.400 resin no kanek rihun 30, inklui sivíl barak.

SAPO TL ho Lusa