PR TAUR HAKFODAK IHA POLISIA TIRU MATE KOMUNIDADE

Prezidenti Repúblika (PR), Taur Matan Ruak, hakfodak bainhira rona keixa husi povu iha Suku Fatumean kona-ba, foin lalais polisia Unidade Patrolamentu Fronteira (UPF), tiru mate komunidade ida iha Suku refere.

“Ha’u nia aman mate iha loron  hira liu ba, hetan tiru husi polisia UPF, tanba ne’e ami husu ba Estadu atu tau matan ba ami oan kiak,” informa Mariano Moniz ba PR Taur Matan Ruak, bainhira Xefi Estadu ne’e dialogu ho povu ina Suku refere, Segunda (15/08).

Alende ne’e, Mariano nia inan, mós informa katak, Estadu tenki tau matan ba nia oan sira, tanba nia laen polisia tiru mate tiha ona.

“Ha’u nia laen mak ema tiru mate ona, tanba ne’e, ami husu ba Estadu atu haree ha’u nia oan sira atu eskola,” dehan Maria.

Purtanto, komunidade Adelino Tilman mós dehan,  bolsa familia ne’e di’ak,  maibé suporta de’it labarik sira ne’ebé tinan 17 mai karaik.

“Tanba ne’e, ami husu sei bele Estadu ajuda povu kbi’it laek nia oan to’o universidade,” katak nia.

Hatan ba preokupasaun ne’e, Prezidenti Repúblika (PR), Taur Matan Ruak, lori Estadu nia naran husu deskulpa ba familia matebian nian.

“Ida ne’e problema uitoan, ha’u foin primeiraves ha’u rona ita nia kazu ida ne’e, mas ha’u sei husu Komandante Polisia Munisipiu, no ha’u mós sei fó hanoin ba Governu atu haree problema ida ne’e,” katak Taur Matan Ruak.

Kona-ba bolsa da maen ne’e, PR Taur Matan Ruak dehan, lei mak  hatete hanesan ne’e duni, kuandu liu ona tinan 17 labele ona, nia tenki ba tuir fali kompetesaun iha bolsa estudu.cos

Jornal Nacional