SEPFOPE Observa Kondisaun Servisu Kompañia Heineken

DILI (ANTIL)—Sekretáriu Estadu Polítika Formasaun Profisionál no Empregu (SEPFOPE), Ilídio da Costa Ximenes vizita konstrusaun fatin bebidas ne’ebé hala’o hosi Kompañia Heineken iha Hera, Dili, Tersa (16/8).

Objetivu hosi vizita ida ne’e, atu haree besik liu-tan kompañia Heineken fó serbisu ba timoroan na´in hira no objetivu seluk maka atu haree timoroan sira ne’ebé maka serbisu iha kompañia ne’e hetan ona formasaun ruma ka lae.

“Realidade hatudu Kompañia Heineken halo polítika ne’ebé liga ho polítika SEPFOPE nian. Antes halo konstrusaun ne’e, timoroan hamutuk 60 maka sira haruka ba tuir formasaun iha Indonézia iha área instalasaun no eletrifikasaun,” Ilídio dehan ba jornalista sira iha Hera, Tersa (16/8).

Nia hatutan traballadór sira ne’ebé maka serbisu iha Kompañia Heineken purvolta 200 no iha mós espesialista hosi rai liur.

”Nee signifika iha buat rua maka sira aprende ba malu. Primeiru, timoroan ne’ebé maka sira haruka ba tuir formasaun iha Rai liur no segundu espesialista mai hosi rai liur (on the job training). Ida ne’e maka dehan indústria halo konstrusaun no indústria mós prepara ema,’ nia hatutan.

Tuir Ilídio katak ida ne’e ezemplu di’ak ida ne’ebé Heineken halo no husu atu Kompañia sira seluk banati tuir ezemplu refere.

Nia sujere ba Kompañia Heineken atu envolve mós formandu sira hosi sentru formasaun hanesan SENAE Becora no Don Bosco Comoro ba área konstrusaun hanesan harii moru no edifísiu tambanudar meiu ida atu prepara juventude sai empreza juvenil no sai badaen ne’ebé profisionál,” Ilídio esplika. (Jornalista: Xisto Freitas/Editor: Alberto Alves)

Foto: Sekretáriu Estadu Polítika Formasaun Profisionál no Empregu, Ilídio Ximenes (imajen iha oin) ho nia komitiva no mós responsável Kompañia Heineken hakat atu ba vizita konstrusaun fatin bebidas no traballadór timoroan sira. Foto ANTIL/Xisto Freitas