F-FDTL Tenke Sai Instituisaun Ezemplár

DILI, (ANTIL) – Atu garante independénsia nasionál, integridade teritorial no seguransa externa Instituisaun Forsa Armada Libertasaun Nasionál Timor-Leste-Forsa Defesa Timor-Leste (FALINTIL-FDTL) tenke sai ezemplár no marka diferénsia entre instituisaun sira seluk.

“Diferente ne’ebé ha’u sei hatudu mak kór Timor, labele lalin buat hotu hosi tasi li’ur, tanba Timor iha abut”, Xefi Estadu-Maior F-FDTL, Koronél Domingos Raul Falur Rate Laek ba jornalista sira iha konferénsia imprensa ne’ebé realiza iha sala konferénsia ministériu defesa Fatuhada, Segunda, (15/8).

Tanba direfénsia, Falur promete, hafoin hetan hikas fiar hodi ajuda superior F-FDTL hodi hala’o servisu sei kumpri kualker desizaun hosi jenerál Lere Anan Timur inklui fó motivasaun atu Jenerál halo dezisaun tuir lei ne’ebé mak vigor.

“Ha’u sei halo buat ne’ebé mak ha’u nia jenerál haruka, ha’u iha ne’e atu motiva nia desizaun no kumpri nia desizaun”, Falur esplika.

Hodi hatutan, buka hanorin F-FDTL forma forsa ida atu la’o iha komunidade nia le’et ne’e ema hotu hadomi, la’os povu ta’uk fali forsa.

Hirak neé hotu jerasaun foun sira iha F-FDTL tenke matenek no sai ezemplár ba ema hotu hodi hatudu instituisaun F-FDTL nu’udar instituisaun ida ne’ebé diferente ho instituisaun sira seluk.(jornalista: Manuel Pinto; editora: Rita Almeida)

Foto: Falur Rate Laek ko’alia ba jornalista sira iha edifisiu Ministériu Defesa Fatuhada, Segunda, (15/8). Foto ANTIL/Manuel Pinto