NINJA HALO ESTUDANTES TAUK BA ESKOLA – PR TAUR FÓ ORDEN PNTL HALO KAPTURASAUN

Estudantes Ensinu Báziku Filial Fohorem, Postu Administrativu Fohorem, Munisípiu Covalima, ta’uk ba eskola, tanba tauk isu ninja ne’ebé durante ne’e espalla iha komunidade nia let katak, ninja oho no estraga ona ema.

“Labarik sira tauk atu ba eskola, tanba situasaun, ami rona katak, mosu ninja iha ita nia rai, tanba ne’e ami husu esplikasaun,” informa Delfin Amaral ba Prezidenti Repúblik (PR), Taur Matan Ruak, liu husi diálogu komunitária ho povu iha Suku refere, Segunda (15/08).

Professor EBF Fohorem, Delfin Amaral, informa katak, tanba saida mak agora Timor Leste (TL) ukun-an tiha ona mós, povu seida’uk moris hakmatek.

Nia hatutan katak, agora dada’uk ne’e mós sira rona katak, mosu ona grupu ilegal balun, no halo ona movimentu iha fat-fatin atu halo povu moris la hakmatek.

“Ami rona katak, iha grupu ilegal balun mosu iha ita nia rai ne’e, atu hatauk povu, tanba ne’e ami husu, ho bahasa karik dehan, hapus lah dia,” dehan nia.

Hatan ba preokupasaun ne’e, PR Taur Matan Ruak husu ba povu atu labele ta’uk, tanba ida ne’e rumoris de’it.

“ha’u husu imi labele  labele hakfodak ho isu ida ne’e, tanba ida ne’e bosok. Ha’u orienta ona PNTL sira atu kaer hotu, atu veteranus fali ka, se fali ka, kaer hotu tiha, labele hanesan ne’e,” informa PR Taur Matan Ruak.

Xefi Estadu ne’e dehan, kuandu hetan tan grupu illegal ne’e, tenki kaer sira hodi sira  labele  la’o ba mai atu habisok povu, tanba ida ne’e kontra lei.

“Normalmente ninja ne’e akontese iha tempu kafe, tanba sira atu naok, sei imi tauk halai, entaun sira naok hotu imi nia sasan,”katak Taur Matan Ruak.cos

Jornal Nacional