UNTL Deskobre Koñesimentu Foun

DILI, (ANTIL) – Peskizadór Universidade Nasionál Timor Lorosa’e (UNTL), Marçal Gusmão deskobre koñesimentu foun kona-ba ai-horis ne’ebé bele kuda iha fatin menus bee liu-husi nia peskiza esperimentál ne’ebé hala’o iha Manleuana, Dili.

“Peskiza esperimentál ne’e atu hetan kandidatu Grasphy leguminoza ne’ebé adopta ka moris rai maran hanesan koto mean, foremungu ne’ebé sempre kuda iha área malirin afinál bele kuda iha fatin menus bee”, peskizadór hosi Fakuldade Agrikultura, UNTL ne’e perante estudante no mídia sira bainhira halo aprezentasaun ba rezultadu peskiza iha Manleuna, foin lalais ne’e.

Grasphy leguminoza nu’udar fonte ai-han ne’ebé iha nia protein barak, tantu ba ema nomós balada sira.

Peskizadór ne’e mós hatete, iha Timor-Leste bainhira populasaun aumenta presiza aihan no aihan menus ita iha ligasaun maka’as ho rekursu rai. Tanba ne’e, presiza hatene oinsá produsaun rai hodi bele sai ai-han.

Relativamente ho rezultadu peskiza ne’e, reitór UNTL, Francisco Miguel Martins apresia ho rezultadu peskiza esperimentál ne’e. “Apresia ho peskiza esperimentál leguminosa tanba, fó vantajen ba dosente no estudante sira halo peskiza”, nia konklui hodi apresia. (jornalista: Rafy Belo; editora: Rita Almeida)

Foto: Peskizadór UNTL husi Fakuldade Agrikultura akompaña husi reitór Francisco Miguel Martins esplika hela kona-ba Grasphy leguminoza ba estudante no mídia sira iha Manleuna, foin lalais ne’e. Foto: Mídia UNTL