PD Sujere Konsentra Programa iha Eleisaun La’ós Istória

DILI, (ANTIL) – Sekretariu Jerál Partidu Demokratiku (PD), Mariano Asanami Sabino hatete, PD sei infrenta dezafiu polítika tanba, eleisaun jerál partidu balun sei uza osan no konta istória pasadu duke konsentra iha programa partidu.

”Dezafiu ba ami  PD iha eleisaun 2017 mak partidu balun sei uza osan no konta istória hodi manan konfiansa duke fa’an nian programa sira”, Asanami ba ANTIL bainhira hasoru malu iha edifísiu Komisaun Nasionál ba Eleisaun, foin lalais ne’e.

Haree ba difikuldade hirak ne’e Assanami informa, PD nia ezisténsia agora mosu tan ona nukleu foun iha partidu nia isin lolon hanesan Movimentu Profesionais Demokratiku (MPD)  nu’udar forsa birokratiku no teknokratiku ne’ebé prontu hodi kontribui ba dezenvolvimentu nasionál iha Timor-Leste, liu-hosi peskiza no analiza.

”MPD harii nu’udar faze importante hodi haburas demokrasia no kuida demokrasia tanba, ohin loron ema hanai liu interese privadu no partidu duke interese nasaun nian”, Asanami katak.

Nune’e Asanami husu ba intelektuál no profesionais sira ne’ebé hadomi demokrasia, tempu to’o ona atu halibur idea no tau hamutuk hanoin hodi tane valór demokrasia iha Timor-Leste hodi loron ruma forsa ida ne’e harii Timor foun ida ba Timoroan tomak.

Maibé atu atinji mehi, Asanami dezafia intelektuál no profesionais sira ne’ebé hadomi demokrasia atu halo diagnostika, nune’e bele hatur loloos fila fali valór ukun rasik-án iha sosiedade.

Demokrasia tenki refleta iha vida ekonomia, infraestruktura, sosiu polítika. ”Bainhira ida ne’e ita hatur ona foin ita hatete katak, povu mak nain ba demokrasia”, Asanami fó hanoin. (jornalista: Manuel Pinto; editora: Rita Almeida)