Provadu Oho La’en, Fernanda Tama Kadeia Tinan 19

DILI - Tribunál Distritál Dili liuhosi desizaun kolletiva, hamonu sentensa tinan 19 kadeia ba arguida Fernanda ne’ebé provadu oho nia La’en Sergio Fátima Martins iha Munisípiu  Ermera.

Arguida Fernanda provadu tau veneno iha kafe hodi fó vítima hemu, nune’e halo vítima nia kondisaun bulelu, hafoin arguida Fernanda ho arguidu na’in rua baku mate nia La’en.

Problema nia hun, hahú hosi vítima husu arguida atu separa maibé arguida lakohi, no tenta atu ba hemu veneno estraga án, maibé vítima konsege salva hosi arguida, maibé iha loron ikus arguida ho arguidu na’in rua futu lia oho vítima liu hosi tau veneno hafoin baku mate.

 Alande ne’e mós ba arguidu Armando Tribunál aplika pena prizaun tinan rua no suspende ba tinan tolu, nune’e mós Tribunál absolve arguidu Mateus hosi kazu refere ho rajaun arguidu sei minoridade.

Tuir provas ne’ebé provadu hafoin arguida baku mate lezada, hetan ajuda hosi arguidu Mateus ho Armando lori vítima ba soe iha fatuk kuak, lori fatuk hanehan nune’e hodi ema labele buka.

Nune’e bainhira vítima nia oan sira husu nia aman, arguida hatan, imi labele husu imi aman, tan nia sei ba servisu. Maibé nia oan sira hatan, be’e motor para hela ne’e.

Durante arguidu sira hakoi subar vítima, arguidu nia jeitu halo ema laiha buat ruma afeita ba nia, no arguidu Mateus ho Armando finji ba sira nia uma hodi ema labele hatene, mais loloos sira na’in tolu oho ona vítima, foin arguidu na’in rua ba sira nia moris fatin.

Asaun sira ne’e, arguida ho arguidu na’in rua halo nune’e atu tenta taka falta para ema labela hatene vítima nia mate, mais realidade vítima sira na’in tolu oho ona lori ba tau hela iha fatuk kuak ne’ebé klo’ot.

Durante loron hira, família buka vítima, arguida nein tau iha prekupasaun,  nune’e bainhira arguida Mateus fila hosi nia knua, hakat ba dapur kotuk foin haree vítima nia liman, tan hakoi iha uma kotuk.

Altura ne’ebá udan iha Munisípiu  Ermera maka’as, nune’e hodi halo arguidu nia isin mate dois,  nune’e família vítima sira informa ba polísia, hodi ikus ba foti vítima hosi fatuk kuak ho isin dois. Liga ba faktus sira hetan iha produsaun provas, nune’e tribunál  koletivu aplika pena tinan 19 kadeia.

Ba arguidu na’in rua Mateus ho Armando ne’ebé hetan pena suspensaun, Tribunál husu atu ba oin labele komete tan krimi, no tenke dok hosi aktu krimi, tan bainhira involve sei hetan kadeia bainhira prosesu to’o tribunal.

Ba desizaun kazu homesidu ne’e, tribunál fó hanoin bainhira parte sira la simu lei fó dalan atu halo rekursu, no prazu ba halo rekursu durante loron 15, hahu hosi loron desizaun.

Audénsia Julgamentu Preside hosi Juiz Koletivu, José Maria,  Francisca Cabral, Maria Solana. Ministériu Públiku reprejenta hosi Prokurador Rogerio Viegas, arguidu hetan asistensia  hosi defensor públiku Rui Guterres.(max)

Timor Post