Motoristas 80% Para Kareta Tuir Modelu Villa Indiana

Assesor Tekniko II Vise Ministeriu Obras Publiku,  Transporte e  Komunikasaun (MOPTK), Basilio M. X. Teixeira, hateten 80% motorista sira iha ona konsiensia hodi para kareta no motor tuir modelu villa Indiana (para tuir lina).

Nia hateten, iha tinan 2015 governu konsege hasai regulamentu ba motorista sira, atu para kareta no motor ho modelu villa Indiana hodi prevene engarrafamentu. 

“Iha inisiu implementasaun ba regras ne’e, iha motorista barak mak la kumpri maibe agora ita bele nota iha 80% motorista komesa hatudu konsiensia hodi para kareta ga motor tuir regras ne’ebe iha,” Assesor Teixeira hateten. 

Pur ezemplu; iha parte Colmera no Audian antes ne’e, nia hateten sempre akontese engarrafamentu, maibe agora laiha ona. 

Nia hatutan, ida ne’e hatudu ba governu katak implementasaun regulamentu hirak ne’e, la’o duni iha terenu no hetan partisipasaun diak husi motorist sira. 

Mesmu hanesan ne’e, nia nafatin husu ba Polisia Tranzito Nasional atu kontinua halo operasaun, hodi enkoraja motorista hotu tenke kumpri regulamentu ne’e. 

“Tanba sei iha motorista 20% mak seidauk kumpri regras ne’e,” nia hateten. 

Iha parte seluk Membru Parlamentu (MP), Anna Ribeiro hateten motorista sira hahu para motor ga kareta tuir modelu vila Indiana ne’e progresu ne’ebe diak, maibe tenke mantein kontrolu. 

“Hau haree iha mudansa, hamenus engarrafamentu no kareta no motor regulariza duni,” nia hateten. 

Iha parte seluk komunidade Alwir dos Santos, hateten seidauk iha konesementu kona ba kareta no motor tenke para tuir modelu villa Indiana. 

“Hau seidauk hatene kona ba modelu ida ne’e,” nia dehan.

The Dili Weekly