Buka Tuir Ruin Nicolau Lobato Kontinua Sai Ajenda Governu

DÍLI, (ANTIL)— Ejijensia familia Saudozu Nicolau Lobato no povu Timor-Leste ba ruin eroi Timor-Leste nian ne’e kontinua sai ajenda governu nian hodi buka tuir.

Ministru Negósiu Estranjeiru no Kooperasaun (MNEK), Hernâni Coelho Perante profisionál komunikasaun sosiál sira iha sala MNEK, Praia dos Coqueiros, Díli hateten katak prosesu buka tuir ruin saudozu sira ne’e, prosesu ida ne’ebé kontinua no manten iha ajenda governu nian.

“Responsabilidade ita hotu ninian, buka tuir ita-nia eroi sira, ba ita-nia saudozu Nicolau Lobato nomós saudozu sira seluk ne’ebé mak oras ne’e ita seidauk hetan sira-nia mate restu atu bele hodi mai, hodi bele haloot didi’ak. Fó onra ba sira,” katak Ministru Hernâni.

Ministru ne’e akresenta tan katak prosesu ne’e sei la’o nafatin, prosesu ne’e imposivel atu aselera, haksoit de’it ne’e labele.“Buat hothotu ita la’o neneik, tuir faze atu ita bele, prosesu ne’e rasik ninia konkluzaun ne’e bele kontribui liutan ba hametin relasaun di’ak entre ita ho ita-nia viziñu sira.”

Atu konklui, Ministru Negósiu Estranjeiru no Kooperasaun, Hernâni Coelho reforsa katak governu toma medidas hothotu, ne’ebé mak bele dehan katak medida nesesáriu, ne’ebé tuir dalan ne’ebé loos atu bele hetan rezultadu ne’ebé di’ak ba hothotu.

Kle’ur ona, Primeiru-ministru dahuluk, Saudozu Nicolau Lobato husik iis tanba luta ba libertasaun nasionál Timor-Leste iha batalla hasoru invazór sira iha Turiscai, iha 31 Dezembru 1978. Loron ne’e, governu Timor-Leste foti no konsidera ona nu’udar loron eroi nasionál Timor-Leste ninian.

Maske nune’e to’o ohin loron, governu no família seidauk hetan ruin no identifika loloos rate husi fundadór partidu ASDT (Associação Social Democrática de Timor-Leste) ne’ebé nakfilak ba FRETILIN (Frente Revolucionário de Timor-Leste Indepedente) iha 11 Setembru 1974 ne’e inklui mós saudozu sira seluk. (Jornalista: Rafy Belo / Editor: Gantry Meilana)

Foto: Ministru Negósiu Estranjeiru no Kooperasaun, Hernâni Coelho