ELEISAUN PARLAMENTAR REMATA, KADA VOTUS GOVERNU SEI SELU MÁXIMU 10 USD

Eleisaun Parlamentar 2017 remata, Governu sei selu Partidu Polítika (Parpol) sira ho máximu dolar US$ 10 no mínimu dolar US$ 1 kada votus, tanba subsidiu kampaiña ninian laiha ona.

Xefi bankada CNRT, Natalino dos Santos dehan, Governu sei la fó ona subsidiu ba ParPol sira, maibé sei selu votus ne’ebé mak kada ParPol ida hetan.

“Kada votu ida, másimu US$10, mínimu US$ 1. Governu nia dekretu lei ne’e, Governu labele selu fali US$ 50 cent, ka US$ 11 dolar kada votu ida, tenki bazeia ba lei ne’e,”informa Natalino dos Santos ba jornalista sira iha Parlamentu Nasionál, Tersa (17/01).

Nia hatutan, kuandu partidu ida hetan votus atu ida de’it, entaun Governu tenki selu tuir votu 100 ne’e.

“Ba eleisaun Parlamentar, foin dada’uk ita halo ona alterasoens ba lei katak, kualker Partidu ida iha direitu atu ba halo kompetisaun, maibé depois rezultadu eleisaun, mak Governu fó fali sira nia osan,”afirma Natalino.

Nia esplika, Governu sei halo dekretu lei ida, tanba tuir lei ne’ebé mak Parlamentu halo ona alterasaun ne’e, hatete ona osan hira mak Governu atu selu ba partidu sira kada votu.

Nia esklarese, ba eleisaun Prezidensial, PN seida’uk halo alterasaun ba lei, entaun Governu tenki tuir nafatin regras ida uluk katak, Governu mak tenki fó subsidiu kampaña nian.

Alende ne’e, Xefi bankada FRENTI MUDANÇA,  José Luis Guterres mós dehan, ne’e Parlamentu Nasionál muda tiha ona.

“Importante ita nia desizaun ne’e, tenki enkoraza demokrásia, nomós enkoraza efisiensia iha sistema demokrátiku,”katak José Luis Guterres.cos

Jornal Nacional