TÁ MEMBRU F-FDTL, PN KESTIONA KAPASIDADE PNTL

Parlamentu Nasionál (PN), kestiona kapasidade Polisia Nasionál Timor Leste (PNTL) hodi garante seguransa ba povu iha Timor laran tomak, tanba membru Falintil Forsa Defeza Timor Leste (F-FDTL) nian mós, ema sivil bele tá hodi halimar.

Prezidenti Komisaun B, ne’ebé trata ba asuntu Defeza Seguransa, David Dias Ximenes ‘Mandati’ hatete katak, akontesimente oho malu ne’e, nia sempre kestiona bei-beik.

“Ha’u sempre dehan katak, labele problema ne’e akontese tiha ona, mak ita halo atuasaun, iha fatin mamuk konaba seguransa iha Timor laran tomak, no fatin mamuk sira ne’e mosu, tanba polisia sira laiha fatin, polisia sira mosu kuandu problema akontese ona,” lamenta David Dias Mandati husi bankada FRETILIN ne’e ba jornalista sira iha Parlamentu Nasionál, Tersa (17/01).

Nia esklarese, horiseik (horibainruak), ema tá membru F-FDTL ida, no membru F-FDTL sira tu’un ba ne’e, baku ema arbiru de’it.

Nia hatutan, polisia sira nunka atu tenta hodi halo prevensaun ho medidas preventivas para problema ne’e mosu.

“Ikus-ikus ne’e, ita rona orsida ema oho malu, rama amon, ema tuda malu. Mas sira so mosu, mas polisia so mosu, kuandu ema halo tiha ona,” dehan David Dias Ximenes.

David Dias Ximenes haktuir, polisia la’os halo kontrolu de’it, bainhira povu halo sala, maibé halo kontrolu ne’e, atu asegura povu.

“Polisia ne’e la’os la’o atu buka de’it, se mak halo krime kaer, maibé atu melindungi rakyat ne’e, husi krime,” tenik David Dias Ximenes.

Nia fó ezemplu katak, ema bo’ot sira ne’e iha eskoltu atu prevene hodi ema labele halo aat ema bo’ot sira, no polisia mós eziste atu fó garantia seguransa ba sidadaun hotu.

Nia relata, filozofia polisia ninian mak dehan, vizibilidade. Entaun vizibilidade ne’e dehan katak, polisia tenki halo movimentu iha fatin hotu, hodi ema bele tauk atu halo krime.

“Ha’u kuandu ko’alia hanesan ne’e, ema dehan katak, ha’u ne’e laran moras polisia, ha’u la laran moras ida, ha’u hakarak buat ne’e di’ak,” afirma David Dias.

Alende ne’e, deputadu Cesar ‘Pilotu’ husi bankada CNRT mós lamenta katak,  hahalok ema sivil taa membru F-FDTL ne’e, krime.

“Se joven sira halo atakes ba membru forsa armada sira, hodi halo kanek, ne’e krime ida grave tebes, kontra membru instrumentu Estadu ninian,” dehan Pilotu.

Nia hatutan, kazu ida ne’e presiza investigasaun, karik problema ne’e mai husi motivu seluk ruma mós krime.

Kazu taa membru F-FDTL iha area Becora nian ne’e, oras ne’e dadauk Polisia Nasional Timor-Leste, Munisípiu Dili kaptura ona ema nain 30 hodi halo prosesu investigasaun.

Tuir primeiru interogatoriu

Husi sorin seluk, Segundu Komandante Jeral PNTL, Komisáriu Faustino da Costa informa katak, suspeitu na’in 31, ne’ebe mak konsege polisia kaptura tanba deskonfia involve iha kazu tá membru F-FDTL iha área Merkadu Becora nia oin, iha Domingu (15/1) ne’e, halo ona identifikasaun no balun submete ona ba primeiru interogatóriu.

Maibé infelizmente Segundu Komandante PNTL, Komisáriu Faustino da Costa dehan katak, seidauk suimu relatóriu ikus husi tribunál konaba prosesu hotu primeiru interogatóriu nian.

“Ema ida mak halo fali asaun hasoru fali autoridade ne’e, ha’u hanoin ne’e nia hasoru nasaun, hasoru Estadu satan membru polisia no forsa armadas uza farda servisu ne’e, nia la’os hasoru pesoal maibé hasoru Estadu,” hateten Faustino Cardoso ba Jornalista sira iha Kuartel Jeral PNTL Caicoli Díli, Tersa feira (17/1/2017).

Segundu Komandante PNTL ne’e husu ba komunidade tomak, liu-liu ba joven sira, wainhira buat ruma ne’ebe liga ho pessoal polisia ka forsa armadas kontaktu mai komandu para haree kestaun ne’e, maibé labele ho lian Indonesia hakarak main hakim sendiri entaun sei infrenta justisa.

Membru F-FDTL ne’ebe hetan tá ne’e ho postu soldadu prontu, nia hetan tá iha parte liman karuk ne’ebe rezulta liman fuan ikun besik kotu, no membru F-FDTL ne’e hetan primeiru sokuru lori liu ba Hospital Nasional Guido Valadares (HNGV) iha kedas Domingu kalan depois de akontesementu.cos/eus

Jornal Nacional