Ministra
Solidaridade Sosial, Isabel Amaral Guterres informa katak, Ministériu
Solidaridade Sosiál (MSS), la preve osan ba fundu kapital ba dezenvolvimentu,
iha Orsamentu Jeral Estadu (OJE) 2017, tanba haree ba mandatu VI nian ne’ebé
atu remata iha fulan Jullu 2017.
Maibé
dehan Isabel Guterres, iha orsamentu MSS nian ne’ebé preve ne’e iha 140 i tal
milloens dolares amerikanu ne’e, ba programa ka planu sira seluk hanesan
Veteranus, bolsa estudu, bolsa da mãe, idozus ka terseira idade no seluk tan,
maibé la tau ba fundu kapital dezenvolvimentu nian.
“Orsamentu
ba Ministériu Solidaridade Sosiál (MSS), nia orsamentu hamutuk 140 i tal
milloens no orsamentu sira ne’e barak liu ba asuntu veteranus ninian. Tanba
haree ba tempu ne’ebé badak ne’ebé iha tinan ne’e nia laran sei tama mós ba VII
Governu, entaun orsamentu ne’e sei jere ba planu ne’ebé iha maka to’o deit iha
mandatu IV Governu ne’e remata. Só ba veteranus sira ne’e mak kontinua
pagamentu to’o tinan ne’e remata tanba asuntu veteranus ne’e aprova tiha ona
iha lei. Ba programa seluk, sei ezekuta orsamentu ne’e to’o deit mandatu
Governu ne’e nian ne’ebé sei remata iha fulan Jullu. Osan ne’ebé iha, ba tinan
ne’e MSS la tau ba iha planu fundus kapital dezenvolvimentu tanba waihira ita
atu halo projetu fízika ida la hotu iha fulan hat ka lima nia laran, maibé sei
lori tempu tinan ida ka tinan ida liu,” esplika Ministra Isabel Guterres ba
jornalista sira iha Palásiu Governu, Díli, Tersa (17/01).
Isabel
Guterres akresenta katak, tinan kotuk OJE ba MSS hamutuk $ 160 i tal milloens
tanba programa ida ba funduz kapital dezenvolvimentu ne’e tama hotu iha
laran, maibé ba tinan ne’e fundus kapital dezenvolvimentu ne’e hasai tiha maka
osan ne’e tun fali ba iha $ 140 i tal milloens deit.
Ministra
Isabel Guterres fundamenta katak, hatete ho tempu ne’ebé badak sei esforsu hodi
ezekuta hotu duni orsamentu ne’ebé aloka ona ba iha MSS ne’e.des
Sem comentários:
Enviar um comentário