PN lamenta hahalok elementu PNTL brutal ba komunidade, Husu Komisariu PNTL foti medida

Deputadu Parlamentu Nasional (PN) husi bankada FRETILIN, Francisco Andrade, lamenta ho hahalok elementu Polisia Nasional Timor-Leste (PNTL) balun  ne’ebé ho brutalismu baku  Juventude sira iha Munisipiu Covalima.

Ho hahalok hirak ne’e, Deputadu  Francisco Andrade  husu ba Komisariu Polisia Nasional Timor-Leste (PNTL) toma medida urjenti ba elementu PNTL sira ne’e.

“Iha semana liu ba hala’o kontaktu eleitoral iha suai iha fatin refere populasaun lamenta tebes brutalidade husi oknum PNTL ne’ebé halo baku juventude sira iha suai, iha dia 28 Novembru membru nain rua halai tuir ba Juventude ida baku iha motor leten juventude monu sira sama tan depois lori kilat fai tan to’o Juventude ne’e iis kotu tiha membru PNTL nain rua ne’e halai depois komunidade sira ne’ebé mak haree kaer tiha sira haruka sira foti fali juventude ne’e lori ba Hospital ne’ebé realidade iha Juventude ne’e nia rui tohar Laos ida ne’e deit iha Juventude barak mak rui tohar tanba hahalok brutalismu oknum PNTL nian” Deputado Francisco Andrade hato’o lia hirak ne’e liu husi plenaria iha PN, Segunda (16/1/17).

Deputado Francisco dehan tan katak, iha dia 31 iha tinan tuan no tinan foun fahe malu elementu PNTL ida ba husu alin feto ida dehan lori ba pasiar, maibe la’os ba pasiar lori ba nia rezidensia halo pemerkosaan.

“Ha’u lahatene ema populasaun bai-bain mak hanesan ne’e Polisia sira ba kaptura tiha ba hatama kedas Prizaun Preventiva ne’eba membru PNTL ida mak hanesan ne’e husik livre lao ba mai hanesan ita bai –bai bain deit lahatene problema ne’e mai ona ka seidauk. Tanba ne’e ha’u husu ba populasun iha neba labele hela nafatin situasaun ida hanesan ne;e atu bele hato’o ba komisariu PNTL ho Ministeriu interior bele hapara situasaun ida ne’e tanba situasaun ida ne’e sira konsidera hanesan  fali milisia 99 mosu fali iha suai ne’eba, tanba juventude sira iha neba agora trauma labele sa’e motor gas oituan polisia sira lori kilat halai tuir ba baku kedas fatin neba kilat nebe mak ita fo ba sira atu halo seguransa maibe realidade iha sira ne’e lae kilat ne’e hodi baku fali juventude sira iha suai,”dehan nia.

Iha fatin hanesan Deputado Antoninho Bianco husi bankada FRETILIN, informa mos katak, elementu PNTL  baku Joven sira la’os iha Suai-Covalima deit, maibe akontese iha fatin barak.

“Dala ruma ema ida ka rua halo atuasaun ne’e dala ruma ho brutal oituan entaun halo foer PNTL nia naran. Ha’u hanoin iha Ainaro mos ha’u hetan iha surat ida iha 28 akontesimentu iha oknum PNTL balun halo asaun sobu hotu ema nia Prizepiu halo buat tun-sae ne’ebé iha joven balun senti ladiak iha fali Hatudo ne’e ema joven sira la-o deit mos baku, ne’e hahalok ladiak hakarak hafoer institusaun PNTL nia naran entaun kuando hetan oknum PNTL ida mak hanesan ne’e tenki hanorin,”dehan Antoninho Bianco husi Komisaun A PN, trata asuntu justisa no poder lokal ne’e.

Entretantu Deputadu Leonel Marçal, husi bankada FRETILIN, hahalok elementu PNTL nian hurlele komunidade arbiru deit ne’e, lahanesan ema profesional.

“Informasaun oknum (elementu) PNTL nia hahalok ne’e la’os foin mak ita rona, maibe bebeik ona akontese iha fatin barak membru ka oknum PNTL sira hatudu sira ninia hahalok lahanesan ema profesional. Halo pergunta bo’ot ida ba komunidade sa formasaun mak sira hetan durante fulan tolu ka fulan 6 iha Sentru formasaun neba ne’e hatudu sira nia brutalidade ne’e iha povu nia leet hatudu katak sira ne’e la’os ema profesional, mesmu oknum ida deit maibe hafoer institusaun tomak nia naran,”tenik Leonel Marçal.

Leonel Marçal hatutan, lolos ne’e PNTL mak sai amigu komunidade nian iha situasaun ruma, la’os sai fali inimigu iha fali povu nia  le’et.

“Ami husu para komisariu bele toma medida ida urjente e medida ida maka’as ba oknum sira ne’e para bele hapara ona violensia ne’ebé mak hala’o  husi oknum PNTL sira,”dehan Leonel.car

Jornal Nacional