PARA IHA FATIN PUBLIKU, GOVERNU SEI KOBRA OSAN BA KARETA-MOTOR

Governu iha ona regulamentu hodi regula kareta ho motor sira ne’ebe mak para iha estrada publiku, hodi nune’e bele hatama reseitas ba kofre Estado.

Tuir responsavel Trafiku, Diresaun Nasional Transportes Terrestre (DNTT), João da Silva katak, DNTT ho Municipiu Dili simu ona ordem katak tempu besik motor no kareta sira ne’ebe mak para iha fatin publiku selu hotu ona.

“Ba oin iha ona regulamentu ne’ebe ba motor ho kareta sira ne’ebe mak para iha fatin publiku sei selu, ne’ebe sei kelola husi municipiu Dili nian, husi parte DNTT enkontru ona ho Municipiu Dili sira mak hare, tanba area ne’e iha municipiu Dili nian,” hateten responsavel Trafiku DNTT, João da Silva ba Jornalista sira iha nia kna’ar fatin, DNTT, Balide, Dili, Sesta (13/01/2017).

Nia hatutan, maneira selu hanesan motor no kareta sir aba para iha fatin publiku iha ne’eba iha pesoal Municipiu Dili nian, kuandu para sira fo kedas bilhete ne’ebe osan ne’e kobra dereitamente kedas.

“Ba motor selu US$ 0.10 cetavos, kareta ki’ik (US$ 0.25 centavos), truck (US$ 0.50 centavos),  kareta boot (US$ 0.75 centavos), no kareta tronton tula container sira mos selu US$ 0.75 centavos.

Nia informa katak, antes atu implementa regra ne’e DNTT hamutuk ho Municipiu Dili sei tun ba halo sosializasaun ho komunidade. Tuir dekretu lei ne’e ba iha teritorio Timor laran tomak, maibe area lima mak sai iha pilotu hanesan Hotel Timor nia oin, Banku Mandiri to’o iha Tribunal Distrital Dili nian no mos fatin seluk, implementasaun sei hein dekretu lei refere publika iha Jornal da Republika.

Antes  ne’e Ministru Estado Koordenador Asuntu Administrasaun e Justisa, no Ministru Administrasaun Estatal, Dionisio Babo Soares, dehan katak, iha ona dekretu lei ne’ebe mak atu regula ba motor no kareta sira ne’ebe mak para iha fatin publiku tenke selu, hodi nune’e bele kontribui ba iha reseitas Estado ninian.

“Ita hein deit dekretu lei ne’e publika iha jornal da republika bele implementa ona, Governu fo kompetensia tomak ba iha municipiu Dili nian atu hare,” dehan Ministru Dionisio Babo. mia

Jornal Nacional