quarta-feira, 11 de janeiro de 2017

Militár Labele Halo Vida Polítika

DILI (ANTIL)— Maijór Jenerál FALINTIL-Forsa Defeza Timor-Leste (F-FDTL), Lere Anan Timur hateten iha militár laiha polítiku ida ne´ebé maka halo vida polítika iha militár nia laran. Tamba ne’e prioridade ba nia iha tinan 2017 maka oinsa reforsa disiplina iha instituisaun forsas armadas nia laran no profisionaliza forsas armadas.

Lere esplika reforsa disiplina ho sintidu katak dever militár ida nian tenki iha disiplina, laiha demokrasia, laiha polítiku ida ne´ebé maka halo vida polítika iha militár nia laran. Kona-ba profisionalizasaun, tuir nia, polítika ida ne´ebé governu tenki hala´o.

“Tinan 15 ita haríi instituisaun forsas armadas no nasaun ita tenki senti katak F-FDTL nu´udar símblu unidade nasionál no símblu orgullu ba Timor-Leste. Governu tenki kria kondisaun ba forsas armadas liu-liu meius hanesan infraestrutura no komunikasaun. Ida ne´e maka importante liu-ba ami,” nia dehan ba jornalista sira iha Palásiu Prezidénsia Repúblika, Bairu-Pité, Dili, Kuarta (11/1), hafoin ramata inkontru ho Xefi Estadu Taur Matan Ruak.

Lere hatutan sira iha planu estratéjiku ou Planu 20-20. Tan ne´e, depende polítiku sira maka tenki hatene hala´o planu estratéjiku ida ne´e ou lae.

Kona-ba sorumutu ho Prezidenti Repúblika, Taur Matan Ruak, nia subliña, ko´alia kona-ba situasaun seguransa no defeza iha rai laran.

“Prezidenti husu kona-ba ami nia preparativu ba kampaña eleisaun prezidensiál no parlamentár. Ha´u dehan katak ami komesa halo planu oinsá maka bele serbisu hamutuk ho Polísia Nasionál Timor-Leste (PNTL) no ami atu empeña ami nia forsa ne´e oinsá para bele asegura eleisaun jerál,” Lere haktuir.

Jornalista: Xisto Freitas / Editor: Gantry Meilana

Foto: Maijór Jenerál FALINTIL-Forsa Defeza Timor-Leste (F-FDTL), Lere Anan Timur, ko´alia ba jornalista sira iha Palásiu Prezidénsia Repúblika. Foto ANTIL/Xisto Freitas

Sem comentários: