quarta-feira, 11 de janeiro de 2017

MJ Iha Kondisaun Halo Akordu Extradisaun

PARTILHAR

DÍLI, (ANTIL) — Hare’e ba Konstituisaun Repúblika Demokrátika Timor-Leste (RDTL), artigu 35o(Extradisaun no espulasaun) iha alinea 1 sita katak ekstradisaun bele halo de’it ho desizaun judisiál, Ministériu Justisa (MJ) maka iha kondisaun hodi bele halo akordu ba extradisaun nian ho nasaun ne’ebe deit.

Ministru Negósiu Estranjeiru no Kooperasaun (MNEK), Hernâni Coelho afirma iha MNEK Praia dos Coqueiros, Díli, foin lalais ne’e katak Timor-Leste (TL) halo kooperasaun bilaterál nomós multilaterál, hanesan Comunidade dos Países da Língua Portuguesa (CPLP) iha área justisa, edukasaun, kultura, seguransa alimentár nomós área seluk tan.

Ko’alia kona-ba akordu extradisaun, ne’e área justisa nian la’ós Ministériu Negósiu Estranjeiru no Kooperasaun (MNEK) nian. Tanba ne’e tuir MinistruHernâni Coelho, MJ maka iha liu kondisaun atu bele halo interpretasaun ba akordu ka tratadu ne’ebé mak iha ho membru CPLP no sira seluk, hodi haree kondisaun saida mak sira bele halo no bele halo to’o limite saida de’it.

“Extradisaun ne’e prosesu judisiál ida, instrusaun husi tribunál sira bainhira, antes de ita bele avansa ba prosesu ne’ebé mak ita bolu prosesu diplomátiku kona-ba kestaun sira hanesan ne’e ninian,” esplika ministru Hernâni.

“Neste momentu seidauk iha pedidu ofisiál kona-ba situasaun ida ne’e. Ne’e duni, ami aguarda,” nia informa tan.

Entretantu Kona-ba estradisaun ne’e rasik, antes ne’e,  Prezidente Parlamentu Nasionál (PN), Aderito Hugo da Costa hateten, diskusaun formál kona-ba estradisaun seidauk konkretiza.“Tanba nee, presiza negosiasaun no komunikasaun ho nasaun sira ne’ebé ita hakarak atu halo akordu ruma,” nia afirma hodi konklui.

Extradisaun dadauk ne’e sai topiku nasional Timor-Leste, hafoin kazu eis Ministra Finansas, Emilia Pires ne’ebe dadauk ne’e iha heala Portugal no lakohi fila ba Timor-Leste relasiona ho kazu ninian ne’ebe Tribunal Distrital Dili hasai ona dezisaun pena prizaun tinan 7.

Jornalista: Rafy Belo / Editór: Gantry Meilana
PARTILHAR

Author: verified_user

Publicação luso-timorense sem fins lucrativos

0 comentários: