domingo, 29 de janeiro de 2017

Presiza Limita Importasaun POP Mie Mai TL

PARTILHAR
Membru Parlamentu (MP) Nasional husu governu atu halo intervensaun ba iha merkadu hodi limita importasaun POP Mie husi Indonezia, tanba produtu ne’e ladiak ba saude publiku.

MP Francisco Branco hateten, iha sistema merkadu ria governu iha poder rua; mak atu estabiliza folin, no selesiona produtus importasaun sira no governu iha direitu atu limita importasaun sasan sira inklui pop mie mai Timor.

Nia hakfodak, tanba importasaun pop mie husi Indonesia mai Timor 6 to’o  18 miloens kardus kada fulan, ne’e ladun diak.  

“Hau hanoin ita labele husik deit, governu tenke interven situsaun ida ne’e, komunidade labele konsume pop mie barak, tanba ladun diak ba saude,” nia preokupa.

Nia hateten, POP mie ladiak ba saude tanba laiha nutrisaun no neneik bele estraga estomuk.

Nia rekonese, katak Timor-Leste adopta merkadu livre, maibe governu iha direitu atu bandu produtus ne’ebe la merese atu tama iha Timor.

Tanba ne’e, nia husu ba governu atu hahu identifika produtus ne’ebe ladiak ba saude publiku, labele importa mai Timor.

Iha parte seluk Sekretaria Estadu ba asuntu Parlamentar, Maria Terezinha Viegas,konsidera ne’e asuntu ne’ebe importante no sei halo inkontru ho ministeriu relevante hodi halo intervensaun ba merkadu hodi limita produtu ne’e.

“Ami sei halo enkontru iha nivel konselho ministru hodi bele haree kona ba asuntu ne’e,” SE Viegas hateten.

Maibe nia mos husu ba membru parlamentu sira presiza kria programa sensibilizasaun ba komunidade sira atu labele konsume produtu ne’e barak liu.

“Ne’e responsabilidade ita hotu nian, oinsa mak bele eduka ita nia komunidade atu hadook aan husi hahan sira hanesan ne’e, tanba la diak ba saude,” nia dehan.

The Dili Weekly - Venidora Oliveira
PARTILHAR

Author: verified_user

Publicação luso-timorense sem fins lucrativos

0 comentários: