Iha
loron-segunda ne'e, embaixada Estadus Unidus nian iha Díli fó sai ona nota ida
hodi esklarese kona-ba notísia falsu ida ne'ebé hatete katak Prezidente
norte-amerikanu hasai tiha ona nesesidade vistu sira ba timoroan sira ne'ebé
vizita nasaun ne'e.
"Laiha
alterasaun ruma iha rekizitu sira vistu nian ba sidadaun Timor-Leste nian,
maski iha boatu no notísia falsu sira ne'ebé hatete kontráriu. Sidadaun
timoroan tomak ne'ebé halo viajen ba EUA ho pasaporte timoroan ida nian tenki
iha vistu válidu iha EUA", refere hosi nota badak ne'ebé fó sai iha lian
inglés no lian tétun.
Komunikadu
badak mosu hafoin notísia falsu ida ne'ebé hatete kona-ba mudansa iha polítika
ba vistu norte-amerikanu sira ba ema timoroan sira sai koñesidu tebes iha
semana ikus ne'e iha rede sosial sira iha Timor-Leste, liuliu iha facebook.
Notísia,
ne'ebé fó sai iha lian portugés hosi site notísia falsu sira nian
(http://cnn-channel.com) fahe dala 3.000 resin hosi facebook iha Timor-Leste,
hamosu komentáriu oioin.
Tuir
informasaun falsu ne'e, Prezidente norte-amerikanu, Donald Trump, asina orden
ida ne'ebé hatete katak timoroan sira bele halo viajen ba Estadus Unidus lahó
vistu.
Testu
hanesan ida, maibé iha Angola, fó sai mós iha semana hirak ikus ne'e, hamosu mós
divulgasaun iha Portal Referénsia (angolanu) ne'ebé fahe ona dala 1.800 antes,
hafoin ne'e, apagadu.
SAPO
TL ho Lusa - Foto@ António Casais /EPA
Sem comentários:
Enviar um comentário