terça-feira, 14 de fevereiro de 2017

Xina kondena ensaiu nuklear norte-koreanu nian

Iha loron-segunda ne'e, governu xinés kondena ona lansamentu misil ida ho alkanse médiu ne'ebé Koreia-Norte halo iha loron-domingu no apela ona ba nasaun envolvidu sira hodi asumi sira nia responsabilidade.

Iha konferénsia imprensa, porta-vós hosi Ministériu Negósiu Estranjeiru xinés, Geng Shuang, kondena ona Pyongyang nia asaun no apela ona ba Estadus Unidus, Koreia-Súl ho Japaun atu impede halo asaun sira ne'ebé bele hamosu aumenta tensaun sira.

Guang la valoriza mós apelau hosi nasaun sira seluk atu Xina presiona Koreia-Norte no apela ona atu nasaun sira ne'ebé halo parte iha konflitu "kaer sira nia responsabilidade" no serbisu hamutuk ba solusaun ida "di'ak bo pasífiku".

"Xina halo hela esforsu sira hodi rezolve problema. Ami nia resforsu sira hanesan evidente", afirma hosi Geng, hafoin governu japunés husu tiha ba Pekin atu presiona Koreia-Norte hodi husik nia programa nuklear sira no misil sira nian.
Japaun, Koreia-Súl ho EUA husu ona ba Konsellu Seguransa ONU hodi halo reuniaun urjente, hafoin ensaiu foun ida hosi Pyongyang, no Geng hatete katak Xina sei partisipa iha reuniaun ho "forma konstrutivu".

Maibé, porta-vós rekuza ona katak Pekin sei apoia reforsu ida hosi kastigu ne'ebé fó ba Koreia-Norte.

"Parte sira ne'ebé envolve tenki mantén kalma no atua ho moderasaun", Gang hatete no afirma katak Pekin promove nafatin diálogu, hasoru "diferensa sira" entre Koreia-Norte ho EUA.

Konsellu Seguransa ONU nian aprova ona, iha tinan liubá, pakote kastigu rua hasoru Koreia-Norte, hafoin nasaun halo tiha teste atómiku rua iha fulan ualu nia laran no lansa tiha projetil balístiku hamutuk 20.

Teste ikus, halo iha loron 07 Fevereiru 2016, konsidera ona hosi komunidade internasional hanesan ensaiu klandestinu ida hosi misil balístiku ida ho alkanse interkontinental.

Xina hanesan aliadu internasional prinsipal Pyongyang nian no EUA ho Japaun konsidera ona katak nasaun bele halo liután hodi trava dezenvolvimentu sira hosi rejimi Kim Jong-un nian.

SAPO TL ho Lusa

Sem comentários: