sexta-feira, 17 de março de 2017

CNRT sei iha forsa maka'as iha kampaña ikus hosi kandidatu Fretilin nian

PARTILHAR
Partidu boot timoroan nian, CNRT, prepara hela prezensa ida boot iha kampaña ikus, iha loron-sesta iha Díli, hosi Francisco Guterres Lu-Olo, Fretilin nia prezidente, nia kampaña ba prezidensial.

Responsável sira Congresso Nacional para a Reconstrução de Timor-Leste (CNRT) iha loron-kinta ne'e halibur ho kordenador munisipal no lokal sira hosi partidu hodi hakotu preparativu sira ba kampaña ne'ebé sei halo iha loron-sesta loraik iha Tasitolu, iha saída osidental Díli nian.

Lu-Olo, atual prezidente hosi Frente Revolucionária do Timor-Leste Independente (Fretilin), sai hanesan favoritu ba eleisaun prezidensial sira iha loron-segunda no konta ho apoiu hosi partidu polítiku lima, inklui partidu boot rua hosi nasaun, Fretilin ho CNRT.

CNRT ho Fretilin hamutuk hetan ona, iha eleisaun lejislativu sira tinan 2012, kuaze 67% hosi votu, nune'e asumi favoritizmu iha votu.

Lu-Olo, ne'ebé kandidatu ba dala tolu (iha tinan 2007 no 2012 manán ba dala uluk, maibé lakon iha votasaun daruak), hatudu fiar ba vitória iha votasaun dahuluk votasaun nian.

Iha enkontru ida ho jornalista sira, Dionísio Babo, sekretáriu-jeral CNRT nian, le ona deklarasaun apoiu "unánime" ida hosi estrutura tomak lideransa nian ba Lu-Olo nia kandidatura, "hametin nune'e pozisaun hosi irmaun Xanana Gusmão, prezidente partidu nian".

"Prezidente partidu nian foti ona desizaun ne'e iha inísiu no partidu CNRT iha loron-kinta ne'e, ho estrutura tomak lideransa nian, responsável sira iha nível nasional, órgaun sira partidu nian, desidi ho lian ida de'it katak membru tomak, kuadru sira, militante sira no simpatizante sira iha loron 20 Marsu vota iha kandidatu ne'ebé maka Prezidente partidu nian hili", nia explika ba Lusa.

"Ami fiar tebes atu sira sei halo no fiar katak kandidatu Lu-Olo sei manán iha votasaun dahuluk", nia afirma.

Francisco Kalbuadi, prezidente hosi Komisaun Polítika Nasional CNRT nian, hatete ba Lusa katak "estrutura lideransa tomak" partidu nian, hahú hosi prezidente Xanana Gusmão to'o elementu sira seluk importante partidu nian, "sei partisipa iha kampaña loron-sesta nian".
"Ami kalkula katak sei iha militante hamutuk rihun lima hosi CNRT ho farda no simpatizante rihun 20 ka 30", nia explika.

Iha deklarasaun ne'e le iha loron-kinta ne'e, CNRT felisita forma "demokrátiku no pasífiku" ne'ebé akontese kampaña, hatudu "orgullu" tanba iha kandidatu na'in ualu ne'ebé disponível hodi serbí nasaun no felisita hahalok hosi organizador sira hosi kandidatura nian no povu tomak.

Nia explika katak apoiu ba Lu-Olo akontese tanba "interese nasional, ba kestaun unidade nasional nian" no ba vontade katak "prosesu tranzisaun interjerasional halo ho dalan pasífiku".

Partidu organiza hela enkontru iha fatin oioin ba militante sira ne'ebé sei tuir ho grupu ba Tasitolu, ne'ebé polísia sei monta operasaun espesial ida tanba kalkula katak sei hanesan kampaña boot ida.

Operasaun sei haree mós ba militante no simpatizante sira hosi António da Conceição, kandidatu hosi Partidu Demokrátiku (PD), ne'ebé halo nia kampaña ikus iha Liquiçá, iha oeste Díli nian ne'ebé sei liuhosi zona Tasitolu.

Conceição, ministru Edukasaun no rival prinsipal Lu-Olo nian, hetan apoia hosi forsa polítika sira seluk, inklui hosi elementu sira Partidu Libertasaun ba Povu (PLPL) no hosi KHUNTO (Partidu Kmanek Haburas Unidade Timor Oan).

Durante kampaña, ne'ebé hotu iha loron-sesta ho debate ida entre kandidatu prezidensial na'in ualu, kampaña boot sira iha nasaun nian halo ona hosi parte Lu-Olo nian no hosi António da Conceição.

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: