CNE: Situasaun "kalma ho iha normalidade" iha tempu ikus kampaña nian

Situasaun iha Timor-Leste hanesan "kalma no normal" iha tempu ikus kampaña nian ba prezidensial sira iha loron 20 Marsu, ho kandidatu sira renova promesa sira hodi la permiti asaun violénsia sira, hatete hosi responsável eleitoral ida iha loron-kinta ne'e.

"Responsável aas sira hosi ekipa eleitoral sira kontinua iha loron-kinta ne'e bolu atensaun ba sira nia apoiante sira no insisti iha kompromisu hodi halo esforsu maka'as hodi evita insidente ruma violénsia nian", hatete hosi prezidente Komisaun Nasional ba Eleisaun nian (CNE), Alcino de Araújo Baris.

"Situasaun hanesan kalma ho normal. Dalaruma ema sira maka la senti laran-metin. Ne'e depende hosi ema ida-idak maibé iha jeral situasaun hanesan kalma ho konsensu hosi ema tomak hodi evita violénsia", nia konsidera.

Baris ko'alia iha enkontru ida ho jornalista sira iha sentru imprensa ne'ebé instala iha CNE no ne'ebé, iha loron-segunda, sei akompaña kontajen ba votu sira iha eleisaun prezidensial sira, ne'ebé sei haruka iha tempu real hosi munisípiu 13 iha nasaun nian.

Responsável hosi CNE fó hanoin katak to'o agora iha de'it insidente todan ida, ne'ebé envolve apoiante na'in haat hosi kandidatura António da Conceição ne'ebé tuda elementu sira hosi kampaña Francisco Guterres Lu-Olo nian iha loron dahuluk kampaña nian.

"Hafoin intervensaun hosi parte rua, esforsu sira hosi CNE no asaun hosi autoridade sira, iha ona kompromisu ida katak sei la repete violénsia no sei la tolera violénsia. Sé maka envolve iha asaun violentu sira sei hatán tuir dalan krimi nian", nia hatete.

Kona-bá avizu ho rekomendasaun sira seguransa nian ne'ebé fó sai hosi ONU iha Timor-Leste no hosi embaixada sira Austrália no Portugal nian iha Díli, Alcino Baris hatete katak "di'ak liu prevene duké kura", maibé nia hatete fali katak buat hotu hakmatek hela.

Iha planu hodi garanti atu mantén normalidade iha loron ikus kampaña nian, polísia no forsa sira defeza timoroan nian sei monta operasaun espesial ida sentradu, liuliu, iha Tasitolu, iha zona orienta kapital nian, no iha lokalidade Liquiçá.

Operasaun hataka evita insidente ruma entre apoiante sira hosi Lu-Olo - kalkula katak sei halibur ema rihun 75 resin iha Tasitolu - no apoiante sira hosi António da Conceição nian ne'ebé tenki liuhosi zona ne'e hodi halo kampaña ne'ebé ajenda ona iha Liquiçá.

Baris felisita katak ne'e hanesan eleisaun dahuluk sira ne'ebé maka halo de'it hosi autoridade timoroan sira, lahó intervensaun ka asisténsia sira hosi ONU no ne'ebé, ho baze iha experiénsia iha pasadu "buat hotu la'o hela ho dalan pozitivu".

Kandidatu na'in ualu aprezenta ona ba eleisaun prezidensial sira. Fatin votu sira sei loke entre tuku 07:00 to'o tuku 15:00 oras lokal.

SAPO TL ho Lusa - Foto@ António Dasiparu  /EPA